ডিজিটেল ডেস্কঃ বেংক সম্বন্ধীয় কাম-কাজ এইকেইদিনত কৰিবলৈ বাকী ৰাখিছে নেকি? ১৬ ডিচেম্বৰৰ পূৰ্বেই সম্পন্ন কৰক আপোনাৰ কাম৷ ১৬ ডিচেম্বৰ আৰু ১৮ ডিচেম্বৰত বেংকৰ কাম-কাজ বন্ধ ৰাখিব বুলি জানিবলৈ দিয়ে ‘ইউনাইটেড ফ’ৰাম অব্ বেংক ইউনিয়নছ’-এ৷ প্ৰধানমন্ত্ৰী নৰেন্দ্ৰ মোদী চৰকাৰে সংসদৰ শীতকালীন অধিৱেশনৰ মাজতে বেংকিং আইন সংশোধনী বিল-২০২১ গৃহীত কৰিবলৈ সকলোধৰণৰ প্ৰচেষ্টা অব্যাহত ৰখা সিদ্ধান্তৰ পাছতে ধৰ্মঘট কাৰ্যসূচী ৰূপায়ণ কৰে৷
উল্লেখ্য যে, বেংকিং আইন সংশোধনী বিল-২০২১ গৃহীত কৰিবলৈ মোদী নেতৃত্বাধীন বিজেপি চৰকাৰে লোৱা সিদ্ধান্তৰ বিৰুদ্ধে ইউনাইটেড ফ’ৰাম অব বেংক ইউনিয়নছ (UFBU) জাঙুৰ খাই উঠিছে। কেন্দ্ৰীয় চৰকাৰে ৰাজহুৱা বেংকসমূহ বেচৰকাৰীকৰণৰ পৰিকল্পনাৰ বিৰুদ্ধে প্ৰতিবাদ সাব্যস্ত কৰি ইউনাইটেড ফ’ৰাম অব বেংক ইউনিয়নে ১৬ ডিচেম্বৰৰ পৰা ১৮ ডিচেম্বৰলৈ প্ৰতিবাদ সাব্যস্ত কৰিব বুলি জানিবলৈ দিয়ে।
সংস্থাটোৱে ঘোষণা কৰা মতে ৰাজহুৱা বেংক ব্যক্তিগতকৰণৰ বিৰুদ্ধে প্ৰতিবাদ সাব্যস্ত কৰি ধৰ্মঘট কাৰ্যসূচী ৰূপায়ণ কৰিব। ইফালে ৰাজহুৱা খণ্ডৰ বেংক প্ৰতিষ্ঠানসমূহৰ সংগঠনৰ প্ৰতিবাদক আওকান কৰি সংসদত বেংকিং আইন সংশোধনী বিধেয়ক গৃহীত কৰিলে পৰৱৰ্তী সময়ত প্ৰায় ৯টা সংগঠনে আন্দোলন তীব্ৰতৰ কৰি তুলিব বুলি সকীয়নি প্ৰদান কৰিছে।
