অ’মিক্ৰন ত্ৰাস! সংক্ৰমণৰ অভিকেন্দ্ৰ হোৱাৰ দিশে আন্তঃৰাষ্ট্ৰীয় বিমানবন্দৰ

নতুন দিল্লী : ক’ভিডৰ উৎপৰিৱৰ্তিত নতুন ৰূপে এতিয়া এতিয়া নতুন উদ্বেগ-উৎকণ্ঠাৰ সৃষ্টি কৰিছে৷ ক’ভিডৰ উৎপৰিৱৰ্তিত নতুন ৰূপক লৈ এতিয়া বিশেষ সতৰ্কতা জাৰি কৰিবলৈ বাধ্য হৈ পৰিছে বিভিন্ন ৰাজ্য৷ দিল্লীতো ইয়াৰ ব্যতিক্ৰম হোৱা নাই। আন্তঃৰাষ্ট্ৰীয় বিমান বন্দৰসমূহত দক্ষিণ এছিয়াৰ ৰাষ্ট্ৰসমূহৰ পৰা যাত্ৰী অহাৰ ক্ষেত্ৰত কঠোৰ নিৰ্দেশনা জাৰি কৰিছে৷ তাৰ পাছতো দিল্লীৰ বিমানবন্দৰত অভাৱনীয় ভিৰ পৰিলক্ষিত হৈছে৷ আজি আন্তঃৰাষ্ট্ৰীয় বিমানবন্দৰৰ পৰা অহা চাৰিগৰাকী লোকৰ নমুনা সংগ্ৰহ কৰি অ'মিক্ৰন সংক্ৰমণৰ পৰীক্ষা কৰাবৰ পঠোৱা হৈছে৷

ইপিনে, বিমানবন্দৰত যাত্ৰীৰ সংখ্যা বৃদ্ধিৰ ফলতে যাত্ৰীসকলে বহু সমস্যাৰ সন্মুখীন হোৱা বুলি অভিযোগ উত্থাপন কৰিছে৷ বিশেষকৈ খোৱা পানী, খাদ্য তথা চাৰ্জিং পইন্টৰ অসুবিধাত পৰিছে বহু যাত্ৰী৷ ক'ভিড তথা অ'মিক্ৰনৰ পৰীক্ষাৰ বাবে দীঘলীয়া শাৰী পাতিবলগীয়া হৈছে৷ উল্লেখ্য যে আন্তঃৰাষ্ট্ৰীয় বিমানেৰে অহা ৩০গৰাকী যাত্ৰীৰ ভিতৰত ২৫গৰাকীৰ দেহতে ধৰা পৰিছে ক'ভিডৰ সংক্ৰমণ৷ লগতে বাকী পাঁচগৰাকী লোকক ক'ভিড আক্ৰান্তৰ সংস্পৰ্শলৈ অহা বুলি সন্দেহ কৰা হৈছে৷ ইয়াৰ ভিতৰত দিল্লীত কেৱল এগৰাকী লোকৰ দেহত ধৰা পৰিছে অ'মিক্ৰন৷ ১৮গৰাকী যাত্ৰীৰ নমুনা পৰীক্ষাৰ বাবে পঠিওৱা হৈছে আৰু বৰ্তমানেও তাৰ ফলাফল অহাৰ অপেক্ষা কৰি থকা হৈছে৷

দিল্লীত মঙলবাৰে মুঠ ৫১জনৰ দেহত ধৰা পৰিছে ক'ভিড সংক্ৰমণ৷ চিকিৎসাধীন হৈ আছে ১৭৩জন আৰু ১৫২জন হোম আইছ'লেচনত আছে৷ ইয়াৰ উপৰি ৰাজ্যখনৰ স্বাস্থ্য বিভাগে মঙলবাৰৰ দিনটোতে ১.৭লাখ লোকক প্ৰতিষেধক প্ৰদান কৰিছে৷ মুঠ ৯২লাখ লোকে সম্পূৰ্ণৰূপে ভেকচিন গ্ৰহণ কৰা বুলি স্বাস্থ্য বিভাগৰ তথ্যত প্ৰকাশ পাইছে৷