ডিজিটেল ডেস্ক :ভাৰতৰ প্ৰধানমন্ত্ৰী নৰেন্দ্ৰ মোডীৰ বিশেষভাৱে জনপ্ৰিয়৷ তেওঁৰ এই জনপ্ৰিয়তাৰ এতিয়া সুযোগ লৈছে উত্তৰাখণ্ডৰ চৰকাৰে৷ কৰবেট টাইগাৰ ৰিৰ্জাভত মোদী চাৰ্কিট গঢ়াৰ পৰিকল্পনা কৰিছে উত্তৰাখণ্ডৰ চৰকাৰে৷ ২০১৯ চনত “মেন ভাৰ্ছেচ ৱাইল্ড” ৰ এটি খণ্ডৰ দৃশ্য গ্ৰহণৰ বাবে উত্তৰাখণ্ডৰ এই অভয়াৰণ্যখন ভ্ৰমণ কৰিছিল নৰেন্দ্ৰ মোডী আৰু বিয়েৰ গ্ৰিলছে৷ মেন ভাৰ্ছেচ ৱাইল্ডৰ বাবে বহুকেইটা দুঃসাহসী কামো কৰিছিল নৰেন্দ্ৰ মোডীয়ে। আনকি দৃশ্যগ্ৰহণৰ সময়ত টাইগাৰ ৰিজাৰ্ভৰ মাজেদি পাৰ হৈ যোৱা ভুৰত উঠি ক’চি নদী পাৰ হৈছিল দুয়ো৷
নৰেন্দ্ৰ মোডী আৰু বিয়েৰ গ্ৰীলছে ভ্ৰমণ কৰা ঠাইসমূহ এতিয়া “মোদী চাৰ্কিট” ৰূপে গঢ়ি তুলিব উত্তৰাখণ্ডৰ চৰকাৰে৷ পৰ্যটকৰ বাবে টাইগাৰ ৰিজাৰ্ভখন অধিক আকৰ্ষণীয় কৰি তোলাৰ বাবে এই পদক্ষেপ হাতত লোৱা হৈছে৷
ইউৰোপৰ ক্ৰোয়েচিয়ালৈ বহু পৰ্যটক গেম অফ থ্ৰ’নৰ দৃশ্যগ্ৰহণ কৰা ঠাই চাবলৈ যায়৷ ইয়াৰ পৰাই উত্তৰাখণ্ডৰ পৰ্যটন বিভাগৰ মন্ত্ৰী সতপল মহাৰাজে মোদী চাৰ্কিট গঢ়ি তুলিবলৈ উৎসাহ লাভ কৰিলে বুলি সংবাদ মাধ্যমত চৰ্চা হৈছে৷ অৱশ্যে ইয়াৰ পূৰ্বতেও মা ভাগৱতী , শিৱ, বিষ্ণু, নৱ-গ্ৰহ, হনুমান আদি চাৰ্কিট গঢ়ি তুলিছে পৰ্যটন মন্ত্ৰী গৰাকীয়ে৷
পৰ্যটকক আকৰ্ষণ কৰিবলৈ উত্তৰাখণ্ডৰ চৰকাৰে লোৱা এই পদক্ষেপে এতিয়া যথেষ্ট আমোদৰো সৃষ্টি কৰিছে৷ ভাৰতত এনে পদক্ষেপৰ উদাহৰণ বিৰল৷ আনৰ দেশৰ দৰে ভাৰতৰো পৰ্যটন উদ্যোগটোক টনকিয়াল কৰিবলৈ এনে পদক্ষেপৰ যথেষ্ট প্ৰয়োজনীয়তা আছে৷
Continue Reading
