ডিজিটেল ডেস্কঃ ৰাজপথত যেন এখন যুদ্ধহে লাগিছে৷ আৰক্ষী আৰু এগৰাকী যুৱতীৰ বাক যুদ্ধ৷ এপিনে আৰক্ষীয়ে নেৰে, আনপিনে যুৱতীয়েও ফেপেৰি পাতি ধৰে৷ ঘটনাৰ বুজ ল’বলৈ অহা সাংবাদিককো যুৱতীৰ ভাবুকি৷যুৱতীৰ ভাষ্য-চিনি পোৱা নাই, মই এম এল এৰ জীয়েক৷ ঘটনাটো ঘটিছে বাংগালুৰুত৷
আজি পুৱাই এজন বিজেপি বিধায়কৰ কন্যাই তীব্ৰ বেগেৰে বিএমডব্লিউ বাহন এখন চলাই গৈ ট্ৰেফিক আইন ভংগ কৰে৷ বিধায়কৰ কন্যাই ট্ৰেফিকৰ চিগনেল নামানি ধুমুহাৰ গতিৰে গাড়ী খন চলাই নিয়ে৷ আৰক্ষীয়ে যেনিবা কিবা প্ৰকাৰে গাড়ী খন ৰখাবলৈ সক্ষম হয়৷
তাৰ পিছতে আৰম্ভ হয় আৰক্ষীৰে বিধায়ক কন্যাৰ তৰ্ক যুদ্ধ৷ বেংগালুৰু আৰক্ষীৰ অভিযোগ অনুসৰি বিধায়ক কন্যাই তেওঁলোকৰ সৈতে দুৰ্ব্যৱহাৰ কৰিছে। ঘটনাটো ৰেকৰ্ড কৰা এজন সাংবাদিকৰ সৈতেও যুৱতীগৰাকীয়ে দুৰ্ব্যৱহাৰ কৰে বুলিও অভিযোগ উঠিছে। বিজেপি বিধায়ক অৰবিন্দ লিম্বাৱলীৰ কন্যাই বগা বিএমডব্লিউ খন চলাই গৈছিল।
সেই সময়ত ট্ৰেফিক লাইট ৰঙা হৈ আহিছিল যদিও তেওঁ ৰোৱা নাছিল। যেতিয়া ট্ৰেফিক আৰক্ষীয়ে তেওঁক বাধা দিছিল তেতিয়া আৰক্ষীৰ সৈতে তেওঁ তৰ্ক কৰিবলৈ আৰম্ভ কৰিছিল৷
তেওঁ আনকি চিটবেল্ট পিন্ধি নাছিল। বহু তৰ্ক -বিতৰ্কৰ পিছত আৰক্ষীয়ে তেওঁক জৰিমনা পৰিশোধ কৰিবলৈ বাধ্য কৰিছিল ৷
বিধায়কৰ কন্যাই আগতেই ট্ৰেফিকৰ চিগনেল উলংঘা কৰাৰ বাবে ৯,০০০ টকা জৰিমনা ভৰিবলগীয়া হৈ আছিলেই, নতুনকৈ তেওঁক ১,০০০ টকা জৰিমনা বিহা হয়৷
ফলত আজি মুঠ ১০,০০০ টকা জৰিমনা পৰিশোধ কৰিহে বিধায়ক কন্যাই ঘৰলৈ উভতিবলৈ সক্ষম হয়৷ সকলোৱে বাংগালুৰু ট্ৰেফিক আৰক্ষীৰ কাৰ্যক প্ৰশংসা কৰিছে৷
Continue Reading
