তীব্ৰ গৰমৰ পৰা পৰিত্ৰাণ পাবলৈ পুখুৰীত জাক জাক বান্দৰৰ জলকেলি

ডিজিটেল ডেস্ক: তীব্ৰ গৰমৰ পৰা পৰিত্ৰাণ পাবলৈ পুখুৰীত নামি সাঁতুৰিলে জাক জাক বান্দৰে৷ কেমেৰাত বন্দী দৃশ্য৷ ৰাজ্যজুৰি অব্যাহত থকা প্ৰচণ্ড গৰমে কেৱল মানুহকে নহয়, অতিষ্ঠ কৰি তুলিছে বন্যপ্ৰাণীসমূহকো। এই তীব্ৰ গৰমৰ পৰা ৰক্ষা পাবলৈ এতিয়া জীৱ-জন্তুৱেও আশ্ৰয় ল’বলগীয়া হৈছে জলাশয়ৰ। শেহতীয়াকৈ তেনে এক ব্যতিক্ৰমী আৰু মনপৰশা দৃশ্য দেখিবলৈ পোৱা গৈছে কাছাৰ জিলাৰ শ্ৰীকোনাত।

প্ৰচণ্ড গৰমৰ পৰা পৰিত্ৰাণ পাবলৈ এক বিশাল বান্দৰৰ জাকে স্থানীয় এটা পুখুৰীত নামি সাঁতুৰি-নাদুৰি থকাৰ এক আমোদজনক দৃশ্য পোহৰলৈ আহিছে। একাংশ স্থানীয় লোকে এই বিৰল দৃশ্য কেমেৰাত বন্দী কৰে, যি বৰ্তমান ছ’চিয়েল মিডিয়াতো বেছ চৰ্চিত হৈ পৰিছে।

প্ৰত্যক্ষদৰ্শীসকলে জনোৱা অনুসৰি, তীব্ৰ গৰমৰ পৰা বাচিবলৈ হঠাতে এটা ডাঙৰ বান্দৰৰ জাকে গছৰ ডালৰ পৰা পানীত জাঁপ দিবলৈ আৰম্ভ কৰে। কোনোৱে যদি ইটোৱে সিটোক সাৱটি ধৰি পানীত উবুৰি খাই পৰিছে, আন কোনোৱে আকৌ পাকৈত সাঁতোৰবিদৰ দৰে পুখুৰীটোৰ ইমূৰৰ পৰা সিমূৰলৈ সাঁতুৰি ফুৰিছে। মানুহৰ দৰেই বান্দৰ কেইটাইও যে গৰমৰ পৰা বাচিবলৈ পানীৰ আশ্ৰয় লৈ এনেদৰে আনন্দ উল্লাস কৰিব পাৰে, তাক দেখি স্থানীয় ৰাইজ আচৰিত হৈ পৰে।