মৃতদেহতো সক্ৰিয় হৈ থাকে কৰ'না ভাইৰাছ; কেন্দ্ৰই প্ৰকাশ কৰিলে উদ্বেগজনক তথ্য

ডিজিটেল ডেস্ক : মৃতদেহতো সক্ৰিয় হৈ থাকে কৰ'না ভাইৰাছ৷ সাৱধান নহ'লে মৃতদেহৰ পৰাই সংক্ৰমিত হ'ব পাৰে ক'ভিড৷ দেশত ক'ভিডে ধাৰণ কৰা দ্ৰুত সংক্ৰমণৰ সময়তে কেন্দ্ৰই উচ্চতম ন্যায়ালয়ক জনাই এই তথ্য৷ কেন্দ্ৰই প্ৰকাশ কৰা তথ্য অনুসৰি ক'ভিড-১৯সৃষ্টি কৰা ভাইৰাছ অৰ্থাৎ কৰ’না ভাইৰাছটো ৯ দিন ধৰি মৃতদেহত সক্ৰিয় হৈ থাকে। ন্যায়াধীশ ডি ৱাই চন্দ্ৰচূড় আৰু সূৰ্য কান্তক লৈ গঠিত এখন বিচাৰপীঠে ছলিচিটৰ জেনেৰেল তুষাৰ মেহতা আৰু চুৰাট পাৰ্চী পঞ্চায়তৰ হৈ উপস্থিত থকা জ্যেষ্ঠ অধিবক্তা ফালি এছ নৰিমনক এটা মধ্যম পথ বিচাৰিবলৈ সংশ্লিষ্ট স্বাস্থ্য মন্ত্ৰালয়ৰ বিষয়াসকলৰ সৈতে আলোচনাৰ বাবে অনুৰোধ জনাইছিল। কেন্দ্ৰই ইয়াৰ শপতনামাত কৈছিল ক'ভিড আক্ৰান্তৰ মৃত শৰীৰটো সম্পূৰ্ণৰূপে ঢাকি ৰাখিব লাগে৷ কোনো কাৰণতে উন্মুক্ত কৰি ৰাখিব নালাগে৷ যিসকল লোকৰ ক'ভিড-১৯ৰ ফলত মৃত্যু হৈছে তেওঁলোকৰ পৰিয়ালৰ সদস্যসকলো সেই মৃত শৰীৰৰ সংস্পৰ্শলৈ যাতে আহিব নোৱাৰে তাৰ প্ৰতি লক্ষ্য ৰাখিব লাগে৷ লগতে কেন্দ্ৰই কয় যে, ‘এতিয়ালৈকে উদ্ভৱ হোৱা বৈজ্ঞানিক প্ৰমাণ অনুসৰি, মৃতদেহত, শাৰীৰিক তৰল, নিঃসৰণ আৰু মৃতদেহৰ সেমেকা কোষত ন দিনলৈকে জীয়াই থাকিব পাৰে।’ মৃতদেহ এটাক জড় পৃষ্ঠ হিচাপে গণ্য কৰা হয়। মৃতদেহৰ পৰা স্বাস্থ্যকৰ্মী বা পৰিয়ালৰ সদস্যক সাৱধানতা অৱলম্বন কৰি আঁতৰি থাকিবলৈ পৰামৰ্শ আগবঢ়োৱা হৈছে৷