মৃ্ত্যু এতিয়া সহজ! HDFC বেংকৰ মহিলা কৰ্মচাৰীৰ কাম কৰি থাকোতেই মৃত্যু

কাম কৰি থকা অৱস্থাত হঠাতে তেওঁ চকীখনৰ পৰা সৰি পৰে আৰু তেওঁৰ মৃত্যু হয়। কোৱা হৈছে যে তেওঁৰ হাৰ্ট এটেক হৈছিল। সহকৰ্মীসকলে কয় যে অত্যধিত কামৰ হেঁচাৰ বাবেই সাদাফ ফাতিমাৰ মৃত্যু হৈছে। অৱশ্যে মৰণোত্তৰ পৰীক্ষাৰ প্ৰতিবেদনৰ পৰাহে মৃত্যুৰ কাৰণ স্পষ্ট হ’ব। কিন্তু সমাজবাদী পাৰ্টিৰ মুৰব্বী অখিলেশ যাদৱে এই মৃত্যুতো বিজেপিৰ দোষ দেখি চৰকাৰৰ ভুল অৰ্থনৈতিক নীতিক দোষাৰোপ কৰে।

সমাজবাদী পাৰ্টিৰ মুৰব্বী অখিলেশ যাদৱে ছ’চিয়েল মিডিয়া প্লেটফৰ্মত লিখিছে এনে খবৰ দেশৰ সাম্প্ৰতিক অৰ্থনৈতিক চাপৰ প্ৰতীক। এই পৰিপ্ৰেক্ষিতত সকলো কোম্পানী আনকি চৰকাৰী বিভাগেও গুৰুত্বসহকাৰে চিন্তা কৰিব লাগিব। এয়া দেশৰ মানৱ সম্পদৰ অপূৰণীয় ক্ষতি। এনে আকস্মিক মৃত্যুৱে কৰ্ম পৰিস্থিতিক লৈ প্ৰশ্ন উত্থাপন কৰে। যিকোনো দেশৰ প্ৰকৃত প্ৰগতিৰ পৰিমাপ সেৱা বা সামগ্ৰীৰ সংখ্যা বৃদ্ধি নহয় বৰঞ্চ এজন ব্যক্তি কিমান মানসিকভাৱে মুক্ত, সুস্থ আৰু সুখী সেয়াহে। বিজেপি চৰকাৰৰ বিফল অৰ্থনৈতিক নীতিৰ বাবে কোম্পানীসমূহৰ ব্যৱসায় ইমানেই কমিছে যে তেওঁলোকৰ ব্যৱসায় বচাবলৈ বহু কম লোকক কাম কৰিবলৈ নিয়োগ কৰে। তেওঁলোকৰ ওপৰত বহুত কামৰ হেঁচা বৃদ্ধি পায়। এনে আকস্মিক মৃত্যুৰ বাবে বিজেপি চৰকাৰ যিমানেই দায়ী, বিজেপি নেতাৰ বক্তব্যই জনসাধাৰণক মানসিকভাৱে মনোবলহীন কৰাৰ সমানেই দায়ী। এই সমস্যা দূৰ কৰিবলৈ কোম্পানী আৰু চৰকাৰী বিভাগসমূহে ‘তাৎক্ষণিক উন্নতি’ৰ বাবে সক্ৰিয় আৰু অৰ্থপূৰ্ণ প্ৰচেষ্টা চলাব লাগে।”

উল্লেখ্য যে ছাদাফ ফাতিমাই মঙলবাৰে কাম কৰি দুপৰীয়াৰ আহাৰ খাবলৈ বহা অৱস্থাত অচেতন হৈ পৰে। লগে লগে তেওঁক চিকিৎসালয়লৈ লৈ যোৱা হয় যদিও চিকিৎসকে তেওঁক মৃত ঘোষণা কৰে। হাৰ্ট এটেকৰ ফলত মৃত্যু হোৱাৰ সম্ভাৱনা প্ৰকাশ কৰিছে চিকিৎসকে।