মৃত্যুৰ কেইঘণ্টামানৰ পূৰ্বে কি অৱস্থাত আছিল বাপ্পী লাহিড়ি? জনালে জোঁৱায়েকে

ডিজিটেল ডেস্ক: মঙলবাৰে মুম্বাইত ৬৯বছৰ বয়সত মৃত্যু ঘটে প্ৰখ্যাত সংগীতশিল্পী বাপ্পী লাহিড়িৰ। কিছুদিনৰ পূৰ্বে চিকিৎসালয়ত ভৰ্তি কৰোৱা হৈছিল৷ মৃত্যুৰ কেইঘণ্টামানৰ পূৰ্বে শিল্পীগৰাকীয়ে হৃদৰোগত আক্ৰান্ত হৈছিল৷ এই কথা জানিবলৈ দিয়ে তেওঁৰ জোঁৱায়েক গোবিন্দ বনচালে৷ বনচালে সংবাদ মাধ্যমৰ আগত কয় যে, ‘তেওঁক তিনি সপ্তাহৰ বাবে চিকিৎসালয়ত ভৰ্তি কৰোৱা হৈছিল যদিও চিকিৎসালয়ৰ পৰা ঘৰলৈ উভতি আহিছিল। তেওঁ মঙলবাৰে নিশা প্ৰায় ৮:৩০-৯ বজাত নিশাৰ আহাৰ গ্ৰহণ কৰিছিল। কিন্তু নিশাৰ আহাৰ গ্ৰহণ কৰাৰ আধা ঘণ্টাৰ ভিতৰতে তেওঁ হৃদৰোগত আক্ৰান্ত হয়। তেওঁৰ হৃদ স্পন্দনৰ হাৰ কমি গৈছিল। তেওঁক ততাতৈয়াকৈ চিকিৎসালয়লৈ লৈ যোৱা হৈছিল আৰু চিকিৎসকসকলে ১১-৪৪ বজাত তেওঁক মৃত বুলি ঘোষণা কৰিছিল৷’ প্ৰথম অৱস্থাত তেওঁক চিকিৎসালয়ত ২৯ দিনৰ বাবে ভৰ্তি কৰা হৈছিল৷ সেই দিনকেইটাৰ ভিতৰত তেওঁ ১৮ দিনেই আইচিইউত আছিল। তাৰ পাছত তেওঁ ভালদৰে আৰোগ্য হৈ ঘৰত আছিল৷ ইপিনে লাহিড়িৰ মৃত্যুৰ পাছৰে পৰা তেওঁৰ কন্যা ৰীমাৰ অৱস্থা যথেষ্ট বেয়া বুলি জানিব পৰা গৈছে৷ বাপ্পী লাহিড়িৰ মুম্বাইৰ জুহুৰ ক্ৰিটিকেয়াৰ চিকিৎসালয়ত অবষ্ট্ৰাক্টিভ স্লিপ এপনিয়াৰ ফলত মৃত্যু হয়। বাপ্পী লাহিড়িয়ে বলীউড জগতলৈ ডিস্কো সংগীতৰ ধাৰা অনাৰ বাবে জনাজাত আছিল। ডিস্কো ডান্সাৰ, শ্বাৰাবী, ডান্স ডান্সৰ দৰে চলচ্চিত্ৰ এলবামৰ সৈতে বাপ্পীয়ে ১৯৮০ৰ দশকত ব্যাপক জনপ্ৰিয়তা অৰ্জন কৰিছিল।