মুছেৱালা হত্যাৰ ঘটনাৰ গুৰুত্বপূৰ্ণ তথ্য ফাদিল, এইবাৰ অভিযান চলিছে নেপালত, জানক সবিশেষ

ডিজিটেল ডেস্ক : পঞ্জাবী গায়ক সিদ্ধু মুছেৱালাৰ হত্যাৰ সম্পৰ্কত এটা বৃহৎ তথ্য উদ্ধাৰ কৰিছে আৰক্ষীয়ে। হত্যাকাৰীক নিজৰ কৱললৈ অনাৰ দিশত এটা গুৰুত্বপূৰ্ণ সাফল্য লাভ কৰিছে আৰক্ষীয়ে। কাৰাৰুদ্ধ গেংষ্টাৰ লৰেন্স বিষ্ণইৰ লৰেন্স বিষ্ণোইক কৰা জেৰাত নতুন তথ্য উদ্ধাৰ কৰিবলৈ সক্ষম হৈছে আৰক্ষীয়ে। দিল্লী আৰক্ষীৰ জেৰাত লৰেন্স বিষ্ণয়ে  স্বীকাৰ কৰিছে যে তেওঁৰ গেঙৰ লোকেই হত্যাকাণ্ডটো সংঘটিত কৰিছিল। বিষ্ণোইক জেৰা কৰাৰ পাছত, দিল্লী আৰক্ষীৰ বিশেষ শাখাৰ এটা দল নেপালত উপস্থিত হৈছে। মুছেৱালাক হত্যা কৰা শ্বুটাৰে নেপালত আত্মগোপন কৰি থকা বুলি সন্দেহ কৰা হৈছে। আৰক্ষীয়ে লাভ কৰা তথ্য অনুসৰি সিদ্ধু মুছেৱালাক গুলীয়াই হত্যা কৰা হত্যাকাৰীকেইজন নেপাললৈ পলাই গৈছে।

দিল্লী আৰক্ষীৰ বিশেষ শাখাৰ সূত্ৰ অনুসৰি, এই হত্যাকাণ্ডত জড়িত আটাইকেইজন শ্বুটাৰক চিনাক্ত কৰা হৈছে। দিল্লী আৰক্ষীৰ বিশেষ শাখাৰ এটা অলপতে শ্বুটাৰৰ সন্ধানত মুজাফ্ফৰনগৰকো অভিযান চলাইছিল। কিন্তু সেই অভিযানত আৰক্ষীয়ে বিশেষ একো সূত্ৰ উলিয়াবলৈ সক্ষম নহ’ল। এতিয়া, বিষ্ণোয়ে জেৰাত প্ৰকাশ কৰা তথ্যক আধাৰ কৰি, নেপালত তালাচী আৰম্ভ কৰিছে। লৰেন্স বিষ্ণোইয়ে দিল্লী আৰক্ষীৰ জেৰাৰ সময়ত হত্যাকাণ্ডটোত তেওঁ প্ৰত্যক্ষভাৱে জড়িত থকাৰ কথা অস্বীকাৰ কৰিছে, কিন্তু স্বীকাৰ কৰিছে যে শ্বুটাৰকেইজন তেওঁৰ দলৰে সদস্য আছিল।

উল্লেখ্য যে, সিদ্ধু মুছেৱালাৰ পৰিয়ালে হত্যাকাণ্ডৰ পাছতে প্ৰথমে ইয়াৰ আঁৰত লৰেন্স বিষ্ণই গেং জড়িত থকা বুলি অভিযোগ কৰিছিল। পৰিয়ালটোৱে অভিযোগ কৰিছিল যে বিষ্ণোই গেঙে মুছেৱালাৰ পৰা ধন দাবী কৰিছিল আৰু ভাবুকি দিছিল। ইয়াৰ পাছতে আৰক্ষীয়ে বিষ্ণোইক জিম্মাত বিচাৰিছিল আৰু তেওঁক জিম্মাক পোৱাৰ পাছতে যোৱা কেইদিনমান ধৰি তেওঁক নিৰন্তৰ জেৰা কৰি থকা হৈছে।

লৰেন্স বিষ্ণই বিগত দীঘলীয়া সময় ধৰি কাৰাগাৰত আছে যদিও কাৰাগাৰৰ পৰাই তেওঁৰ নিৰ্বিঘ্নে অপৰাধিক কাম-কাজ চলাই থৰা বুলি অভিযোগ উঠিছে। তেওঁৰ গেঙৰ বাহিৰত থকা সদস্যসকলে বিষ্ণইৰ নিৰ্দেশত যিকোনো কাম কৰিবলৈ সাজু হৈ থকা বুলি প্ৰকাশ পাইছে। মুছেৱালাৰ হত্যাকাণ্ডও তেওঁৰ ইংগিত পোৱাৰ পাছতে সংঘটিত হোৱা বুলি অভিযোগ উঠিছে। উল্লেখ্যে যে, বিষ্ণই গেঙৰ নেটৱৰ্ক দেশৰ কেইবাখনো ৰাজ্যত বিয়পি আছে। তেওঁৰ অন্যতম সহযোগী গোল্ডী ব্ৰাৰে বিদেশৰ পৰা গেং চলোৱাত সহযোগ কৰি আছে। গোল্ডী ব্ৰাৰেই মুছেৱালা হত্যাৰ দায়িত্ব স্বীকাৰ কৰিছিল।