ডিজিটেল ডেস্ক : দেশত অবাঞ্চিত ধৰ্মীয় উন্মাদনা আৰু ৰাজনৈতিক বিতৰ্কৰ নতুন কেন্দ্ৰ হৈ পৰিছে জ্ঞানৱাপী মছজিদ। মছজিদটো হিন্দু মন্দিৰৰ ভূমিত প্ৰতিষ্ঠা কৰিবলৈ কৰা চেষ্টাই এতিয়া ব্যাপক বিতৰ্কৰ সূত্ৰপাত ঘটাইছে। ন্যায়ালয়ৰ হস্তক্ষেপ ধৰ্মীয় স্থলটোত স্থিতাৱস্থা বাহাল ৰখা হৈছে যদিও একাংশ ধৰ্মগুৰুৱে এতিয়া ন্যায়ালয়ৰ নিৰ্দেশকো অমান্য কৰি অধিক অস্থিৰতা সৃষ্টিৰ চেষ্টা চলোৱা দেখিবলৈ পোৱা গৈছে।
শংকৰাচাৰ্য স্বামী স্বৰূপানন্দ সৰস্বতীৰ এগৰাকী শিষ্যই ঘোষণা কৰিছে যে, তেওঁৰ অনুগামীসকলে ৪ জুনত জ্ঞানৱাপীত উদ্ধাৰ হোৱা শিৱলিংগত পূজা-অৰ্চনা আগবঢ়াব। এই বিতৰ্কিত ঘোষণা কৰা শংকৰাচাৰ্যৰ শিষ্যজন হৈছে স্বামী অভিমুক্তেশ্বৰানন্দ। তেওঁ কয় যে, যদিহে তেওঁলোকক শিৱলিংগত পূজা অৰ্চনা কৰাৰ পৰা প্ৰশাসনে বাৰণ কৰে তেন্তে তেওঁ শংকৰাচাৰ্যক এই বিষয়ে অৱগত কৰিব আৰু তেওঁৰ নিৰ্দেশ পালন কৰিব।
স্বামী স্বৰূপানন্দ সৰস্বতী হৈছে গুজৰাটৰ দ্বাৰকা শ্বাৰাদা পীঠম আৰু বদ্ৰীনাথৰ জ্যোতি মঠৰ শংকৰাচাৰ্য। স্বামী অভিমুক্তেশ্বৰানন্দে বাৰানসীত সাংবাদিকৰ আগত কয় যে, ধৰ্ম সম্পৰ্কত ধৰ্মাচাৰ্যগৰাকীৰ সিদ্ধান্তই হৈছে চূড়ান্ত। উচ্চতম ন্যায়ালয়ে যিদৰে আইন নিৰ্ধাৰণ কৰে তেনেদৰে ধৰ্মৰ পথ বা নিৰ্দেশনা নিৰ্ধাৰণ কৰে ধৰ্মাচাৰ্যই। সনাতন ধৰ্মত শংকৰাচাৰ্য হৈছে আটাইতকৈ ডাঙৰ আচাৰ্য আৰু স্বৰূপানন্দ হৈছে আটাইতকৈ জ্যেষ্ঠ।
তেওঁ লগতে কয়, জ্ঞানৱাপীত বিশ্বনাথজী অৰ্থাত ভগৱান শিৱ প্ৰকট হৈছে। আমি তাত হিন্দু সম্প্ৰদায়ৰ হৈ পূজা-অৰ্চনা কৰাৰ বাবে তাত সকলো জা-যোগাৰ কৰিছোঁ। আমি কোনো ৰাজনৈতিৰ হিন্দু নহয়, আমি হৈছোঁ প্ৰকৃত হিন্দু। শনিবাৰে পূজা-অৰ্চনা কৰাৰ কথা ঘোষণা কৰি তেওঁ এই মন্তব্য কৰে।
ন্যায়ালয়ৰ বিচাৰাধীন হৈ থকা এটা বিষয়ত ধৰ্মগুৰুৰ এনে হস্তক্ষেপ আৰু বলপূৰ্বক ধৰ্মীয় আচৰণ কৰাৰ সিদ্ধন্তই পৰিস্থিতিৰ অৱনতি ঘটোৱাৰ আশংকা আছে বুলি কোৱা হৈছে। এই ক্ষেত্ৰত প্ৰশাসনে কি ব্যৱস্থা গ্ৰহণ কৰে সেয়া লক্ষ্যণীয় হ’ব।
Continue Reading
