মুক্তি পালে 'বনকুঁৱৰী'; তৰুণ শিল্পীৰ অন্তৰপৰশা গীতে চুইছে সংগীতপ্ৰেমীৰ অন্তৰ

মুছফিক হুছেইনঃ অসমীয়া সংগীত জগতত বৰ্তমান বহুতো যুৱ কণ্ঠশিল্পীয়ে সংগীতৰ নতুন সোৱাদ দিবলৈ সক্ষম হৈছে আৰু শ্ৰোতা-দৰ্শকেও গানৰ এক সুন্দৰ ধাৰা উপভোগ কৰিবলৈ সক্ষম হৈছে৷ একাংশ নৱ-প্ৰজন্মৰ বৰ্তমান সৃষ্টি সঁচাকৈ লেখত ল’বলগীয়া, সেয়া লাগিলে সাহিত্য অথবা মনোৰঞ্জনেই নহওঁক কিয়! বিশেষকৈ সংগীতৰ ক্ষেত্ৰখনক আৰু এখোজ আগুৱাই নিয়াত যুৱ প্ৰজন্মৰ অৰিহণা যথেষ্ট আছে৷

শেহতীয়াকৈ যুৱ প্ৰজন্মৰ এগৰাকী উদীয়মান কণ্ঠশিল্পী সিদ্ধাৰ্থ হাজৰিকাৰ( Siddharth Hazarika)কণ্ঠত মুক্তি পালে 'বনকুঁৱৰী' নামৰ এটা সুন্দৰ লিৰিকেল ভিডিঅ’৷ ১৬ অক্টোবৰত গীতটোৱে ইউটিউবত মুক্তি লাভ কৰাৰ পাছতে শ্ৰোতাই গীতটিৰ প্ৰতি ইতিবাচক সঁহাৰি আগবঢ়াইছে৷ গীতটোৰ কণ্ঠ, সুৰ আৰু সংগীত সিদ্ধাৰ্থ হাজৰিকাৰ৷ উল্লেখ্য যে, সিদ্ধাৰ্থ হাজৰিকাই ইয়াৰ পূৰ্বেও কেইবাটাও সুমধুৰ গীত শ্ৰোতাক উপহাৰ দিছে।

অসমীয়া কেইবাখনো ছবি যেনে 'চিঞৰ', 'মিছন চাইনা', 'দূৰ', 'কেলেণ্ডাৰ', 'প্ৰিয়াৰ প্ৰিয়', 'নিজানৰ গান' আদিত গান গাইছে। 'দূৰ' চিনেমাখনৰ সংগীত পৰিচালনাও কৰিছিল সিদ্ধাৰ্থ হাজৰিকাই। উল্লেখ্য যে 'কেলেণ্ডাৰ'ত গোৱা গীতৰ বাবে তেওঁক 'প্ৰাগ চিনে এৱাৰ্ড-২০১৮'ৰ শ্ৰেষ্ঠ কণ্ঠশিল্পীৰ বঁটাৰে সন্মানিত কৰা হৈছিল।

'চিঞৰ' চিনেমাত গোৱা 'অকোৱা পকোৱা এই বাটে' শীৰ্ষক গীতটিৰ বাবে তেওঁ শ্ৰোতাৰ মাজত বিশেষ পৰিচিতি লাভ কৰিবলৈ সক্ষম হৈছিল। বনকুঁৱৰীৰ গীতৰ কথা কস্তুৰী বৰঠাকুৰৰ(Kasturi Borthakur) আৰু দৰ্শকেও বনকুঁৱৰীৰ গীতৰ কথাক লৈ প্ৰশংসাৰে উপচাই পেলাইছে৷ উল্লেখ্য যে,কস্তুৰী বৰঠাকুৰে লিখা প্ৰথম গীতটি আছিল 'টোপাল টোপাল' (Toopal Toopal)। গীতটি গাইছিল সত্যব্ৰত কলিতাই। জনপ্ৰিয় কণ্ঠশিল্পী বৰ্ণালী কলিতাৰ 'দৰিকা দিচাং' শীৰ্ষক বিহুসুৰীয়া গীতটিও পৰাগ লাহনৰ সৈতে দ্বৈতভাবে লিখিছিল কস্তুৰীয়ে। 'বনকুঁৱৰী' কস্তুৰী বৰঠাকুৰে লিখা তৃতীয়টো মুক্তিপ্ৰাপ্ত গীত। বনকুঁৱৰীৰ লিৰিকেল ভিডিঅ'টি প্ৰস্তুত কৰিছে অম্বৰীশ বৰকটকীয়ে।

বনকুঁৱৰী (Bonkunwori)গীতটি শুনিবলৈ ইয়াত ক্লিক কৰক