ডিজিটেল ডেস্কঃ মুম্বাইৰ ছাণ্টাক্ৰুজ অঞ্চলৰ হোটেল গ্যালাক্সিত ভয়ংকৰ অগ্নিকাণ্ড সংঘটিত হৈছে। দেওবাৰে আবেলি সংঘটিত অগ্নিকাণ্ডত এতিয়ালৈকে তিনিজন লোকৰ মৃত্যু হৈছে। অগ্নিকাণ্ডৰ ফলত কমেও পাঁচজন লোক আহত হৈছে বুলি জানিব পৰা গৈছে। কেইবা খনো অগ্নি নিৰ্বাপক বাহিনীৰ গাড়ীয়ে জুই নিৰ্বাপন কৰিবলৈ চেষ্টা অব্যাহত ৰাখিছে। হোটেলখনৰ ভিতৰত কেইবাজনো লোক আৱদ্ধ হৈ থকা বুলি জানিব পৰা গৈছে। আৰক্ষী আৰু অগ্নি নিৰ্বাপক বাহিনীৰ কৰ্মীয়ে তেওঁলোকক উদ্ধাৰ কৰিবলৈ চেষ্টা কৰি আছে।
দেওবাৰে দুপৰীয়া প্ৰায় ১ বজাত ছাণ্টাক্ৰুজৰ হোটেল গ্যালাক্সিত এই অগ্নিকাণ্ড সংঘটিত হয়। চাৰিখন অগ্নি নিৰ্বাপক বাহিনীৰ গাড়ী ঘটনাস্থলীলৈ গৈ জুই নুমুৱাবলৈ চেষ্টা কৰে। জুই ইতিমধ্যে নিয়ন্ত্ৰণলৈ অনা হৈছে। অগ্নি নিৰ্বাপক বাহিনীৰ এজন বিষয়াই প্ৰকাশ কৰা মতে আঠজন লোকক উদ্ধাৰ কৰা হৈছে আৰু তেওঁলোকক ওচৰৰ কুপাৰ চিকিৎসালয়ত ভৰ্তি কৰোৱা হৈছে। তেওঁলোকৰ মাজৰে পাঁচজনৰ অৱস্থা সংকটজনক।
উল্লেখ্য শনিবাৰে তামিলনাডুত চলন্ত ৰে’লত গেছ চিলিণ্ডাৰ বিস্ফোৰণ হোৱাৰ পিছত দুটা ডবাত জুই লাগিছিল। ঘটনাটোত আঠজন লোক নিহত হৈছিল। সেই অগ্নিকাণ্ডৰ ঘটনাটো তামিলনাডুৰ মাদুৰাইত সংঘটিত হৈছিল। ৰে'লৱে সূত্ৰই জনোৱা অনুসৰি আইআৰচিটিচিৰ বিশেষ ৰে'ল ভাৰত গৌৰৱ এক্সপ্ৰেছত সেই দুৰ্ঘটনাটো সংঘটিত হয়। বিশেষ ৰে’লখন উত্তৰ প্ৰদেশৰ লক্ষ্ণৌৰ পৰা ৰামেশ্বৰমলৈ গৈ আছিল। বিশেষ ৰে’লখনত উত্তৰ প্ৰদেশৰ পৰা যোৱা বহু তীৰ্থযাত্ৰী আছিল।
Continue Reading
