নাৰী দিৱসত কলংক; পৰ্ন ভিডিঅ’ চাই দুই দলিত কন্যাক ধৰ্ষণ পাঁচ কিশোৰৰ

ডিজিটেল ডেস্ক : নাৰী দিৱসত এক অভাৱনীয় ঘটনা সংঘটিত হ’ল। নাৰীৰ বাবে উৎসৰ্গিত এই দিনটোতে নাৰী নিৰ্যাতনৰ এক জঘন্য ঘটনা সংঘটিত হ’ল। পাঁচজন কিশোৰে বিকৃত কামনা চৰিতাৰ্থ কৰিবলৈ দুগৰাকী দলিত কন্যাৰ জীৱন কৰি পেলালে নেফানেফ। স্মাৰ্টফোনত পৰ্ন ভিডিঅ’ চাই এই ভয়ংকৰ কাণ্ড সংঘটিত কৰে এই পাঁচ কিশোৰে। ঘটনা সংঘটিত হৈছে বিহাৰত। অপৰাধ আৰু অপৰাধীৰ ৰম্যভূমি বিহাৰৰ শ্বেখপুৰা জিলাত পাঁচজন কিশোৰে দুগৰাকী নাবালিকা দলিত কন্যাক দলবদ্ধভাৱে বলাৎকাৰ কৰাৰ ঘটনা পোহৰলৈ অহাৰ পাছতে দেশজুৰি প্ৰতিক্ৰিয়াৰ সৃষ্টি হৈছে। কিশোৰী দুগৰাকী এখন চৰকাৰী বিদ্যালয়ৰ ক্ৰমান্বয়ে ষষ্ঠ আৰু সপ্তম শ্ৰেণীৰ শিক্ষাৰ্থী আছিল বুলি জানিব পৰা গৈছে। ইফালে, এই জঘন্য কাণ্ডত অভিযুক্ত ৩ জন কিশোৰ ষষ্ঠ শ্ৰেণীৰ ছাত্ৰ হোৱাৰ লগতে বাকী দুজন ক্ৰমান্বয়ে সপ্তম শ্ৰেণী আৰু অষ্টম শ্ৰেণীৰ ছাত্ৰ আছিল। ইমান কম বয়সতে তেওঁলোকৰ মনত এনে ভয়ংকৰ অপৰাধে শিপা মেলা কাৰ্যক লৈ তীব্ৰ প্ৰতিক্ৰিয়াৰ সৃষ্টি হৈছে। এই ঘটনাৰ ভুক্তভোগী এগৰাকী ৯ বছৰীয়া কিশোৰীৰ আইতাকে দিয়া অভিযোগৰ আধাৰত আৰক্ষীয়ে গোচৰ ৰুজু কৰিছে। পাঁচোজন অভিযু্ক্ত কিশোৰ ইতিমধ্যে আৰক্ষীৰ জালত পৰিছে। আৰক্ষীৰ জেৰাত কিশোৰকেইজনে স্বীকাৰ কৰিছে যে, তেওঁলোকে স্মাৰ্ট ফোনত পৰ্ণ ভিডিঅ' চোৱাৰ পাছত এই জঘন্য অপৰাধ  সংঘটিত কৰিছিল। ইণ্টাৰনেট সুলভতাই কিদৰে একাংশ কম বয়সীয়া কিশোৰক বিপথে পৰিচালিত কৰিছে তাৰ এক নিদাৰুণ দৃষ্টান্তত পৰিণত হৈছে বিহাৰৰ এই ঘটনা।