ৰণবীৰক কিয় শিকলিৰে বান্ধি ৰাখে দীপিকাই ? সিং বোৱাৰীৰ মুখত সুখী সংসাৰৰ টিপছ...

নতুন দিল্লীঃ বলীউডৰ অন্যতম 'পাৱাৰ কাপল' দীপিকা পাডুকোন আৰু ৰণবীৰ সিং। দীৰ্ঘদিনীয়া প্ৰেমৰ অন্তত ২০১৮ চনত বিবাহ পাশত আৱদ্ধ হৈছিল দুয়ো। বলীউডৰ জনপ্ৰিয় যুটি হিচাপেও বিশেষ পৰিচয় বুটলিবলৈ সক্ষম হৈছে ৰণবীৰ-দীপিকাই। শেহতীয়াকৈ বলীউড অভিনেত্ৰী দীপিকাই বৈবাহিক জীৱনত সুখৰ ৰহস্যৰ বিষয়ে কেতবোৰ মন্তব্য কৰা পৰিলক্ষিত হৈছে। ফিল্মি কম্পেনিয়ানক দিয়া এক সাক্ষাৎকাৰত দীপিকাই কয়, ‘ আমাৰ বৈবাহিক জীৱন সুখী হোৱাৰ মূল কাৰণ হৈছে ৰণবীৰ আৰু মোৰ মাজত বুজাবুজি। সহজ অৰ্থত ক'বলৈ গ'লে, আমি আমাৰ ব্যক্তিগত জীৱনৰ সৈতে জড়িত সকলোবোৰ কথাই আলোচনা কৰো।

আলোচনা মানে এইটো নহয় যে, আমাৰ সকলোবোৰ কথাতে দুয়োজনৰ মাজত সাংঘাটিক মিল থাকে। আলোচনাৰ মাধ্যমেৰেহে আমি এটা মতত উপনীত হও। এনেদৰে আলোচনা হ’লে সংসাৰখন ভালে থাকে। বৈবাহিক জীৱনত এইটো বৰ গুৰুত্বপূৰ্ণ কথা।কিবা কাৰণত আমাৰ মতান্তৰ হ’লেও আমি ইজনে-সিজনক বুজো। ’
ইফালে, ৰণবীৰৰ বৰ্ণময় ব্যক্তিত্ব আৰু জীৱনৰ বিষয়ে দীপিকাই কয়, ‘মই মানুহজনক শিকলিৰে বান্ধি ৰাখো। নহ’লে আৰু কি কৰিব পাৰো। ৰণবীৰে এইটো কথা আৰু ভালদৰে বুজি পায়। মই যে তেওঁৰ ওপৰত খং কৰিও একো কৰিব নোৱাৰো। সৰু ল’ৰাৰ দৰে খং কৰিলেও সুখী হয় তেওঁ। সঁচাকথা ক'বলৈ গ'লে, মই এই ক্ষেত্ৰত ৰণবীৰক সলনি কৰিব নোৱাৰো। তেওঁ মোৰ সৰু সৰু কথাতে ৰং পায়। মোৰ মনেও লাহে লাহে তাকে মানি লৈছে।’ স্বাভাৱিকতে দীপিকা পাডুকনৰ সৈতে হোৱা এই বাৰ্তালাপে ব্যাপক চৰ্চা লাভ কৰা দেখিবলৈ পোৱা গৈছে। সামাজিক মাধ্যমতো দীপিকাৰ কথাই আমোদ দিছে বহুতকে।