ডিজিটেল ডেস্কঃ এগৰাকী মহিলা চিকিৎসকৰ ৰহস্যজনক মৃত্যু। মৃত মহিলা চিকিৎসকগৰাকীৰ নাম ডাঃ ৰিচা পাণ্ডে। ডাঃ ৰিচাৰ মৃত্যুৰ সময়ত বয়স আছিল মাত্ৰ ২৫ বছৰ।
৪ মাহ পূৰ্বে দন্ত চিকিৎসক ডাঃ অভিজিত পাণ্ডেৰ সৈতে বিবাহপাশত আৱদ্ধ হৈছিল ডাঃ ৰিচা পাণ্ডে। নৱবিবাহিতা চিকিৎসকগৰাকীৰ মৃত্যুত সকলো হতভম্ব হৈ পৰিছে। এই ঘটনা সংঘটিত হৈছে ভূপালত।
ডাঃ ৰিচা পাণ্ডেৰ মৃতদেহ নিজ বাসগৃহতে উদ্ধাৰ হৈছে। হাতৰ বাহুত বেজীৰ চিন থকা দেখিবলৈ পোৱা গৈছে ডাঃ ৰিচাৰ মৃতদেহত।
শুকুৰবাৰে পুৱা বহু দেৰিলৈকে নুঠা দেখি স্বামীয়ে ডাঃ ৰিচাৰ দুৱাৰত টুকুৰিয়ায়। তেওঁ কোনো সঁহাৰি নিদিয়াত ফোনো কৰে বহুবাৰ। ফোনৰো সঁহাৰি নিদিয়াত ডাঃ অভিজিত পাণ্ডে চিন্তাত পৰে। তেতিয়া ডাঃ অভিজিতে ওচৰ-চুবুৰীয়াৰ পৰা সহায় বিচাৰিলে আৰু যেতিয়া তেওঁলোকৰ প্ৰচেষ্টা বিফল হ’ল, তেতিয়া দুৱাৰখন ভাঙিবলৈ এজন শ্ৰমিকক মাতি অনা হয়। শ্ৰমিকে দুৱাৰ ভাঙে আৰু তেওঁলোকে কোঠাৰ ভিতৰত সোমোৱাৰ পাছত ডাঃ ৰিচাক বিচনাত অচেতন অৱস্থাত পৰি থকা দেখিবলৈ পায়।
ততাতৈয়াকৈ ৰিচাক চিকিৎসালয়লৈ নিয়া হয় আৰু চিকিৎসকে তেওঁক মৃত বুলি ঘোষণা কৰে।
আৰক্ষীয়ে কয় যে বৃহস্পতিবাৰে নিশা এই দম্পতী পৃথক পৃথক কোঠাত শুইছিল আৰু তেতিয়াই এই অঘটন ঘটে। তেওঁৰ হাতত বেজীৰ চিন পোৱা গৈছে, যাৰ ফলত গোচৰটো সন্দেহজনক হৈ পৰিছে। অৱশ্যে মৃত্যুৰ কাৰণ এতিয়াও জানিব পৰা হোৱা নাই। মৰণোত্তৰ পৰীক্ষাৰ পিছতহে মৃত্যুৰ কাৰণ নিশ্চিত হ’ব। মহিলা চিকিৎসকগৰাকীৰ মৃত্যুৰ কাৰণ আত্মহত্যা নে হত্যা তাৰ তদন্ত অব্যাহত ৰাখিছে আৰক্ষীয়ে।
Continue Reading
