ডিজিটেল ডেস্ক : নির্বাচন আয়োগে সমগ্র দেশৰ ভোটাৰ তালিকাৰ পৰা ভুৱা ভোটাৰৰ নাম আঁতৰোৱা আৰু কেইবা দশকৰ এই পুৰণি সমস্যাটো তিনি মাহৰ ভিতৰত নির্মূল কৰাৰ অংগীকাৰ কৰে। নিৰ্বাচন আয়োগে এই কথা প্রকাশ কৰিছে।
উল্লেখযোগ্য যে ভোটাৰ তালিকাত ভুৱা ভোটাৰৰ নাম অন্তর্ভুক্ত হোৱাৰ লগতে ভোটাৰ তালিকাৰ শুদ্ধতাক লৈ দেশত বিতর্ক চলি থকাৰ সময়তে আয়োগে এই কথা ঘোষণা কৰে।
আয়োগে লগতে এই কথাও প্রকাশ কৰে যে ভোটাৰ তালিকাৰ নিয়মীয়া উন্নীতকৰণৰ প্ৰক্ৰিয়াত জন্ম-মৃত্যু পঞ্জীয়ন বিষয়াসকলৰ সৈতে সমন্বয় স্থাপন কৰি এই প্ৰক্ৰিয়াটো অধিক শক্তিশালী কৰা হ'ব। এটা বিবৃতিত নির্বাচন আয়োগে লগতে প্রকাশ কৰে যে ভোটাৰ তালিকাক আধাৰ নম্বৰৰ সৈতে সংযোজিত কৰাৰ বাবে ইউ আই ডি এ আই আৰু আয়োগৰ বিশেষজ্ঞৰ মাজত কাৰিকৰী দিশটোক লৈ অচিৰেই আলোচনা আৰম্ভ কৰা হ'ব। আয়োগে অলপতে ৰাজনৈতিক দলসমূহৰ সৈতে হোৱা বৈঠকত এই কথা স্পষ্ট কৰি দিয়ে যে খচৰা ভোেটাৰ তালিকাত কোনো ধৰণৰ নামৰ অন্তৰ্ভুক্ত বা কৰ্তনৰ দাবী আৰু আপত্তি ১৯৫০ চনৰ জনপ্রতিনিধি আইনৰ অধীনত সকলো ৰাজনৈতিক দলৰ বাবে উপলব্ধ আইনী ব্যৱস্থাৰ অধীনত নিয়ন্ত্ৰণ কৰা হ'ব।
ৰাজনৈতিক দলসমূহে খচৰা ভোটাৰ তালিকাক লৈ এনে ধৰণৰ কোনো দাবী-আপত্তি দাখিল নকৰিলে নির্বাচন পঞ্জীয়ন বিষয়াৰ (ই আৰ অ') দ্বাৰা প্ৰস্তুত কৰা তালিকা গ্রাহ্য হ'ব। আয়োগে কয় যে জানুৱাৰীত ভোটাৰ তালিকাৰ বিশেষ সংক্ষিপ্ত সংশোধনীৰ প্ৰক্ৰিয়া সম্পূৰ্ণ হোৱাৰ পাছত মাত্র ৮৯টা ফাৰ্ষ্ট আপীল আৰু মাত্র এটা ছেকেণ্ড আপীল দাখিল কৰা হৈছিল। আয়োগে লগতে প্রকাশ কৰে যে নিৰ্বাচনী প্রক্রিয়া শক্তিশালী কৰাৰ কাৰণে সাহসিক পদক্ষেপ গ্রহণ কৰা হৈছে। তলৰ পৰ্যায়ত বিভিন্ন বিষয় সমাধান কৰাৰ কাৰণে প্রায় ৫ হাজাৰ নিৰ্বাচনী বিষয়াই ৩১ মার্চলৈকে ৰাজনৈতিক দলসমূহৰ সৈতে নিয়মীয়াকৈ আলোচনা কৰিব। আনহাতে ৰাজ্যৰ মুখ্য নির্বাচন বিষয়া, জিলা নির্বাচন বিষয়া আৰু নির্বাচন পঞ্জীয়ন বিষয়াকে ধৰি আয়োগৰ বিষয়াসকলক ডিজিটেল প্রশিক্ষণ দিয়া হ'ব। আয়োগে প্রকাশ কৰে যে প্ৰায় এক কোটি নির্বাচন কৰ্মচাৰীৰ ক্ষমতা বৃদ্ধিৰ কাৰণে ডিজিটেল প্ৰশিক্ষণৰ ব্যৱস্থা কৰাৰ কথা বিবেচনা কৰি থকা হৈছে।
উৎসঃ দৈনিক জনমভূমি
