‘নীট’ৰ বিধেয়কক লৈ উত্তাল তামিলনাডু: বিপৰীত মেৰুত ৰাজ্যপাল-ৰাজ্য চৰকাৰ

ডিজিটেল ডেস্ক: ‘নীট’ বিধেয়কক লৈ উত্তাল হৈ পৰিছে তামিলনাডু৷ বিপৰীত মেৰুত অৱস্থান ৰাজ্যপাল আৰু ৰাজ্য চৰকাৰৰ৷ তামিলনাডুৰ ৰাজ্যপাল আৰ.এন. ৰবিয়ে বিধানসভাৰ অধ্যক্ষৰ ওচৰলৈ স্নাতক চিকিৎসা ডিগ্ৰী পাঠ্যক্ৰমৰ বাবে এনইইটি-আধাৰিত নামভৰ্তি সম্পৰ্কীয় এখন বিধেয়ক ঘূৰাই দিছে৷ ৰাজ্যখনৰ ৰাজভৱনে এই তথ্য সদৰি কৰিছে৷ যোৱা বছৰৰ ছেপ্টেম্বৰত বিধানসভাৰ দ্বাৰা গৃহীত নীটৰ বিধেয়কখনে শিক্ষাৰ্থীসকলক +২ নম্বৰৰ আধাৰত স্নাতক চিকিৎসা ডিগ্ৰীৰ বাবে নামভৰ্তিৰ সুযোগ প্ৰদান কৰিছিল। এনইইটিৰ পৰা ৰাজ্যৰ বাবে ৰেহাই বিচৰা বিধেয়কখনৰ এক বিতং অধ্যয়ন আৰু এই সন্দৰ্ভত ৰাজ্য চৰকাৰে গঠন কৰা উচ্চ-পৰ্যায়ৰ সমিতিৰ প্ৰতিবেদনৰ পিছত ৰাজ্যপালগৰাকীয়ে এই মত পোষণ কৰিছিল যে বিধেয়কখন ৰাজ্যখনৰ গ্ৰাম্য আৰু অৰ্থনৈতিকভাৱে দৰিদ্ৰ শিক্ষাৰ্থীসকলৰ শিক্ষাৰ্থীসকলৰ স্বাৰ্থৰ বিৰোধী৷ সেয়েহে, ৰাজ্যপালে বিধেয়কখন বিগত ১ ফেব্ৰুৱাৰীত তামিলনাডু বিধানসভাৰ অধ্যক্ষক ঘূৰাই পঠিয়াইছে৷ উচ্চতম ন্যায়ালয়েও বিষয়টো বিশেষভাৱে সামাজিক ন্যায়ৰ দৃষ্টিকোণৰ পৰা পৰীক্ষা কৰিছে৷ ইপিনে, ৰাজভৱনৰ বিজ্ঞপ্তি প্ৰকাশৰ কেইঘণ্টামানৰ ভিতৰতে তামিলনাডু চৰকাৰে কয় যে তেওঁলোকে পুনৰ বিধানসভাত একেখন বিধেয়ক গৃহীত কৰাৰ বাবে পদক্ষেপ ল’ব। এই সন্দৰ্ভত গ্ৰহণ কৰিবলগা পদক্ষেপসমূহৰ বিষয়ে আলোচনা কৰিবলৈ চৰকাৰে সচিবালয়ত এখন সৰ্বদলীয় বৈঠকো আহ্বান কৰিছে।