ডিজিটেল ডেস্ক: কেন্দ্ৰীয় সংস্থা নিটি আয়োগৰ মুখ্য কাৰ্যবাহী বিষয়া হিচাপে নিযুক্তি দিয়া হৈছে প্ৰাক্তন প্ৰশাসনিক বিষয়া পৰমেশ্বৰণ আয়াৰক। আজি ভাৰতৰ কৰ্মচাৰী আৰু প্ৰশিক্ষণ বিভাগে এক বিবৃতি যোগে এই ঘোষণা কৰিছে। কেবিনেটৰ নিযুক্তি সমিতিয়ে পৰমেশ্বৰণ আয়াৰৰ নিযুক্তিত অনুমোদন জনাইছে বুলি ইতিমধ্যে জাৰি হোৱা এক চৰকাৰী অধিসূচনাত উল্লেখ কৰা হৈছে।
নিটি আয়োগৰ বৰ্তমানৰ মুখ্য কাৰ্যবাহী বিষয়া অমিতাভ কান্তৰ কাৰ্যকাল ২০২২ চনৰ ৩০ জুনত সম্পূৰ্ণ হ'ব আৰু ইয়াৰ পাছতে আয়াৰ এই পদত অধিষ্ঠিত হ'ব। কান্তক ২০১৬ চনৰ ১৭ ফেব্ৰুৱাৰীত দুবছৰীয়া কাৰ্যকালৰ বাবে নিটি আয়োগৰ মুখ্য কাৰ্যবাহী বিষয়া হিচাপে নিযুক্ত কৰা হৈছিল যদিও পিছত তেওঁৰ কাৰ্যকাল সম্প্ৰসাৰণ কৰা হৈছিল।
শ্ৰীনগৰত জন্মগ্ৰহণ কৰা পৰমেশ্বৰণ আয়াৰ ১৯৮১ চনৰ বেচৰ এজন আইএএছ বিষয়া। আয়াৰে ২০০৯ চনত ভাৰতীয় অসামৰিক সেৱাৰ পৰা স্বেচ্ছামূলক অৱসৰ লৈছিল। একেটা বছৰতে তেওঁ বিশ্ব বেংকৰ জল সম্পদ শাখাৰ মেনেজাৰ হিচাপে নিযুক্ত হয়।
২০১৬ চনত তেওঁ খোৱা পানী আৰু অনাময় মন্ত্ৰালয়ত সচিব হিচাপে যোগদান কৰে। আয়াৰে লগতে ৰাষ্ট্ৰসংঘত এজন জ্যেষ্ঠ গ্ৰাম্য পানী অনাময় বিশেষজ্ঞ হিচাপেও কাম কৰিছিল।
কেন্দ্ৰীয় চৰকাৰে গ্ৰহণ কৰা স্বচ্ছ ভাৰত অভিযান কাৰ্যকৰী কৰিবলৈ ২০১৬ চনত আয়াৰক দায়িত্ব প্ৰদান কৰিছিল। ২০২১ চনত তেওঁ জল শক্তি মন্ত্ৰালয়ৰ খোৱা পানী আৰু অনাময় বিভাগৰ সচিব পদৰ পৰা পদত্যাগ কৰিছিল।
Continue Reading
