নিৰ্বাচনৰ বতৰত উত্তৰ প্ৰদেশত গংগা-কাশী-বিশ্বনাথ মন্দিৰক লৈ তৎপড়তা

ডিজিটেল ডেস্ক : আজি বাৰাণসীত উপস্থিত প্ৰধানমন্ত্ৰী নৰেন্দ্ৰ মোদী৷ সজাই-পৰাই তোলা হৈছে কাশী বিশ্বনাথ৷ কাশী বিশ্বনাথ প্ৰকল্পৰ পুনৰ নিৰ্মাণ কাৰ্য শুভাৰম্ভ কৰিবৰ বাবে আজি প্ৰধানমন্ত্ৰীগৰাকী দিনৰ উপস্থিত হয় বাৰাণসীত৷ ৩৩৯কোটি ব্যয় সাপেক্ষে নিৰ্মাণ হ'ব লগা এই প্ৰকল্পটোৱে কাশী বিশ্বনাথ মন্দিৰ আৰু গংগা ঘাটক সংযোগ কৰিব৷ পাঁচ লাখ বৰ্গফুট এলেকা সামৰি লোৱা প্ৰথমটো প্ৰকল্পত ২৪টা বিল্ডিং মুকলি কৰা হ'ব বুলি জানিব পৰা গৈছে৷ বহু পূজা-পাৰ্বনত অংশ লৈ প্ৰধানমন্ত্ৰীয়ে শুভাৰম্ভ কৰিব প্ৰকল্পটোৰ প্ৰথম পৰ্যায়ৰ কাম-কাজ৷

উত্তৰ প্ৰদেশৰ বিধানসভা নিৰ্বাচনৰ পূৰ্বে কাশী বিশ্বনাথ প্ৰকল্প মুকলিয়ে শাসকীয় দলৰ এক নিৰ্বাচনী কৌশল হিচাপেই অনুমান কৰিব পাৰি৷ নিৰ্বাচনী প্ৰচাৰ তথা ভোটাৰক আকৰ্ষণৰ এক চেষ্টাৰে সজাই তোলা হৈছে আজিৰ এই উদ্বোধনী অনুষ্ঠান৷ ৰাজ্যখনৰ মুখ্যমন্ত্ৰী যোগী আদিত্যনাথসহ প্ৰায় ৩০০ গৰাকী ধৰ্মীয় নেতা, সাধু সন্ন্যাসী, শিল্পী প্ৰমুখ্যে ভালেসংখ্যক গণ্য-মান্য লোকে এই কাৰ্যসূচীত অংশগ্ৰহণ কৰিব৷ এই অনুষ্ঠানত অংশ ল'বলৈ উপস্থিত হৈছে কেইবাখনো ৰাজ্যৰ বিজেপিৰ মুখ্যমন্ত্ৰীসকল৷ অসমৰ মুখ্যমন্ত্ৰী ডঃ হিমন্ত বিশ্ব শৰ্মায়ো পত্নী ৰিণিকী ভূঞা শৰ্মাসহ উপস্থিত হৈছে বাৰাণসীত৷

প্ৰধানমন্ত্ৰীগৰাকীয়ে প্ৰথমে ঐতিহাসিক কাল বৈৰভ মন্দিৰ দৰ্শন কৰে৷ দুদিনীয়া বাৰাণসীত ভ্ৰমণৰ বাবে যোৱা প্ৰধানমন্ত্ৰীয়ে বিভিন্ন অনুষ্ঠানত ভাগ ল’ব বুলিও জানিব পৰা গৈছে৷

উল্লেখ্য যে কাশী বিশ্বনাথ মন্দিৰ ট্ৰাষ্টে জনোৱা মতে সেই বিখ্যাত ধৰ্মীয় স্থানটি 'স্বৰ্ণ মন্দিৰ' বুলিও পৰিচিত৷ প্ৰধানমন্ত্ৰীৰ আগমনৰ পূৰ্বে সেই স্থানত কটকটিয়া কৰা হৈছে নিৰাপত্তা ব্যৱস্থাও৷ অৱশ্যে এই প্ৰকল্পক লৈ বিৰোধী দলসমূহে বহু অভিযোগ তথা আপত্তি দৰ্শাই আহইছে৷ সেই সন্দৰ্ভত ৰাজ্যখনৰ মুখ্যমন্ত্ৰী যোগী আদিত্যনাথে কয় যে ক'ভিডৰ সময়ত ক'ত আছিল বিৰোধী দলসমূহ৷ এই মহামাৰীৰ সময়তো বিজেপিয়ে কাম চলাই গৈছে৷ ইয়াৰ উপৰি ৰাজ্যখনত গংগা এক্সপ্ৰেছ প্ৰকল্পৰ কথা উল্লেখ কৰি কয় যে অহা ১৮ ডিচেম্বৰত মোদীয়ে সেই প্ৰকল্পৰো শিলান্যাস কৰিব৷