নিৰ্বাচনৰ সময়তে পেকেজৰ মোনা লৈ ঘূৰে ৰাজনৈতিক নেতাই

ডিজিটেল ডেস্ক: মণিপুৰলৈ আহিব প্ৰধানমন্ত্ৰী নৰেন্দ্ৰ মোদী৷ লক্ষ্য আগন্তুক বিধানসভা নিৰ্বাচন৷ সেয়েহে নৱবৰ্ষৰ প্ৰথম দিনকেইটাতে ভ্ৰমণৰ সিদ্ধান্ত লৈছে মণিপুৰত৷ নিৰ্বাচনৰ পূৰ্বে প্ৰধানমন্ত্ৰীয়ে মণিপুৰ উন্নয়নৰ বাবে আগবঢ়াইছে ৪,৮০০ কোটি টকাৰ পেকেজো৷ ভোটাৰক আকৰ্ষণৰ নানা কৌশল ৰচিছে এতিয়া বিজেপিয়ে৷ প্ৰতিবাৰে নিৰ্বাচনৰ আগতহে ঘোষণা হোৱা আকৰ্ষণীয় পেকেজৰ আশাতেই বন্দী যেন জনতা৷ নিৰ্বাচনৰ পাছত প্ৰতিশ্ৰুতি ফুটুকাৰ ফেনস্বৰূপ৷ খবৰ ল’বলৈও যেন আহৰি নাই চৰকাৰ কিম্বা শীৰ্ষ নেতাৰ৷

প্ৰায় ২বছৰ ৯মাহৰ পাছত প্ৰধানমন্ত্ৰী মোদীয়ে সময় উলিয়াইছে মণিপুৰৰ উন্নয়নৰ খতিয়ান ল’বলৈ৷ ইয়াৰ পূৰ্বে ২০১৯ চনৰ এপ্ৰিল মাহত মোদী মণিপুৰ ভ্ৰমণত আহিছিল৷ সদা ব্যস্ত প্ৰধানমন্ত্ৰীগৰাকীৰ নিৰ্বাচনৰ পূৰ্বে ৰাজ্যখনত দেখা নগ’ল কোনো উন্নয়ন, শিলান্যাসৰ বিশেষ কাৰ্যসূচীত৷ সেয়েহে প্ৰায় দীঘলীয়া বিৰতিৰ পাছত প্ৰধানমন্ত্ৰীয়ে ৰাজ্যখনত স্বাস্থ্য, যাতায়াত-যোগাযোগকে ধৰি বহুকেইটা খণ্ডৰ কাম-কাজত অধিক গুৰুত্ব প্ৰদান কৰিছে৷ অন্যান্য দলেও অৱশ্যে নিৰ্বাচনকেন্দ্ৰিক কিছু প্ৰতিশ্ৰুতি তথা পেকেজৰো ব্যৱস্থা নকৰা নহয়৷

ভাৰতীয় জনতা পাৰ্টীৰ শাসনতে থকা ৰাজ্যখন পুনৰ শাসনলৈ অহাৰ চেষ্টাত এতিয়া উঠিপৰি লাগিছে শাসকীয় দলটোৱে৷ মণিপুৰত অত্যাধুনিক কেন্সাৰ হাস্পতালৰ শিলান্যাস, ২০০খন বিচনাযুক্ত ক’ভিড হাস্পতাল উদ্বোধন, সংখ্যালঘু উন্নয়ন, তাঁতশিল্প শক্তিশালী কৰাকে ধৰি বহুকেইটা নতুন প্ৰতিশ্ৰুতিৰ সম্ভাৰ লৈ উপস্থিত হ’ব প্ৰধানমন্ত্ৰীগৰাকী৷ কাইলৈ প্ৰধানমন্ত্ৰীৰ আগমন তথা নতুন পেকেজ ঘোষণাই কিদৰে ভোটাৰক আকৰ্ষণ কৰিব সেয়া নিৰ্বাচনৰ ফলাফলতহে প্ৰতিফলিত হ’ব৷