ডিজিটেল ডেস্কঃ তেলেগু দেশম পাৰ্টিৰ প্ৰতিষ্ঠাপক নন্দমুৰি তাৰকা ৰামা ৰাও (এনটিআৰ)ৰ কনিষ্ঠ কন্যা কণ্ঠামনেনি উমা মহেশ্বৰীয়ে হায়দৰাবাদৰ জুবিলী হিলছত থকা নিজ গৃহত আত্মহত্যা কৰে। এই ঘটনাই অন্ধ্ৰ প্ৰদেশত চাঞ্চল্যৰ সৃষ্টি কৰিছে। উল্লেখ্য যে এনটিআৰৰ কনিষ্ঠ কন্যা হোৱাৰ উপৰিও অন্ধ্ৰ প্ৰদেশৰ প্ৰাক্তন মুখ্যমন্ত্ৰী চন্দ্ৰবাবু নাইডুৰ নবৌয়েক আছিল তেওঁ।
আৰক্ষীৰ মতে, দেওবাৰে নিশা প্ৰায় ১২ বজাত পৰিয়ালৰ লোকে কোঠাটোৰ চিলিং ফেনত ওলমি থকা তেওঁৰ মৃতদেহ উদ্ধাৰ কৰে। ভিতৰৰ পৰা দুৱাৰত তলা লগাই থোৱা আছিল। প্ৰাথমিক তদন্ত অনুসৰি তেওঁ দীৰ্ঘদিন ধৰি অসুস্থ হৈ আছিল আৰু অসুস্থতাৰ বাবে তেওঁ ডিপ্ৰেছনত আছিল।
এই ডিপ্ৰেছনৰ চিকাৰ হৈয়ে কণ্ঠামনেনি উমা মহেশ্বৰীয়ে আত্মহননৰ পথ বাচি লোৱা বুলি সন্দেহ কৰা হৈছে। বৰ্তমান আৰক্ষীয়ে এটা গোচৰ ৰুজু কৰি মৰণোত্তৰ পৰীক্ষাৰ বাবে তেওঁৰ মৃতদেহ ওছমানিয়া হাস্পতাললৈ প্ৰেৰণ কৰিছে।
আৰক্ষীয়ে CrPC (আত্মহত্যাৰ সন্দৰ্ভত তদন্ত আৰু প্ৰতিবেদন) ১৭৪ ধাৰাত গোচৰ ৰুজু কৰিছে। উমা মহেশ্বৰী আছিল এন টি ৰামা ৰাওৰ চতুৰ্থ কন্যা।
উল্লেখ্য যে কণ্ঠামনেনিৰ পিতৃ এন টি ৰামা ৰাওৱে নিজৰ কেৰিয়াৰত শিল্পী, পৰিচালক আৰু প্ৰযোজক হিচাপে কাম কৰিছিল। ইয়াৰ পিছত তেওঁ ৰাজনীতিৰ পথাৰত ভৰি দিয়ে। তেওঁ টিডিপি (তেলেগু দেশম পাৰ্টি) প্ৰতিষ্ঠা কৰে। তেওঁ অন্ধ্ৰ প্ৰদেশৰ মুখ্যমন্ত্ৰী হিচাপেও কাৰ্যনিৰ্বাহ কৰিছিল।
Continue Reading
