অধিবক্তাৰ বেশেৰে প্ৰৱেশ কৰিছিল হত্যাকাৰী, দিল্লীৰ আদালতৰ ভিতৰতে গুলীয়াই হত্যা গেংষ্টাৰক

ডিজিটেল ডেস্ক : হিন্দী ছবিৰ কাহিনীৰ দৰেই আদালতৰ মজিয়াতে ভয়ংকৰ গুলীচালনাৰ ঘটনা সংঘটিত হ’ল। ছবিৰ কাহিনীত প্ৰতিপক্ষই লোৱাৰ দৰে আদালতৰ মজিয়াত প্ৰাণ কাঢ়ি লোৱা হ’ল এজন গেংষ্টাৰৰ। ছবিৰ নিখুঁট দৃশ্যায়নৰ দৰেই আক্ৰমণকাৰীয়ে অধিবক্তাৰ বেশেৰে আদালতত প্ৰৱেশ কৰে আৰু এজন কাৰাবন্দী অপৰাধীক লক্ষ্য কৰি গুলীচালনা আৰম্ভ কৰে। এই গুলীয়াগুলীত আন দুজন লোক নিহত হৈছে। এই আক্ৰমণত আন ভালেমান লোক আহত হোৱা বুলিও জানিব পৰা গৈছে।

এই ঘটনাৰ ভিডিঅ’ত এটা ইতিমধ্যে ভাইৰেল হৈ পৰিছে। উত্তৰ দিল্লীৰ ৰোহিনী আদালত চৌহদত সংঘটিত এই আক্ৰমণৰ ঘটনাত প্ৰতিপক্ষই গেংষ্টাৰ জিতেন্দ্ৰ গোগীক গুলীয়াই হত্যা কৰা বুলি জানিব পৰা গৈছে। আক্ৰমণকাৰী দুজন লোকৰো মৃত্যু হোৱা বুলি ধাৰণা কৰা হৈছে। তেওঁলোকক নিৰাপত্তাবাহিনীৰ লোকে গুলীয়াই হত্যা কৰে।

তিহাৰ জেলত কাৰাবন্দী হৈ থকা দুৰ্ধৰ্ষ অপৰাধী তথা গেংষ্টাৰ জিতেন্দ্ৰ গোগীক আজি আদালতলৈ অনাৰ সময়তে তেওঁৰ প্ৰতিপক্ষ তিল্লু গেঙৰ লোকে আদালত চৌহদতে আক্ৰমণ কৰে। তেওঁলোকে অধিবক্তাৰ পোছাকেৰে আদালতত প্ৰৱেশ কৰিছিল আৰু গেংষ্টাৰজনলৈ লক্ষ্য কৰি গুলী চলাইছিল। এই গুলীবৰ্ষণত গেংষ্টাৰজনৰ থিতাতে মৃত্যু হয় আৰু নিৰাপত্তাবাহিনীৰ লোকে পাছত আক্ৰমণকাৰী দুয়োজন লোকক গুলীয়াই হত্যা কৰা বুলি দিল্লী আৰক্ষীয়ে প্ৰকাশ কৰিছে।