ডিজিটেল ডেস্কঃ ৰোহিত শৰ্মা, বিৰাট কোহলীয়ে অষ্ট্ৰেলিয়াৰ বিৰুদ্ধে ফাইনেলত পৰাজয় মানি ল’ব নোৱাৰে। তেওঁলোকৰ মুখৰ পৰা স্পষ্ট হৈ পৰিছিল যে তেওঁলোক মানসিকভাৱে বিধ্বস্ত হৈ পৰিছে। খেলখনৰ শেষৰ বলটো বলিং কৰি খেলপথাৰত থিয় হৈ কান্দিছিল মহম্মদ ছিৰাজে। ড্ৰেছিং ৰুমলৈ উভতি অহাৰ পাছতো কিছুদিন স্বাভাৱিক অৱস্থালৈ ঘূৰি আহিব নোৱাৰে ক্ৰিকেটাৰসকলে।
ড্ৰেছিং ৰুমত প্ৰশিক্ষক ৰাহুল দ্ৰাবিদে তেওঁলোকক সংযত কৰি ৰাখিবলৈ চেষ্টা কৰিছিল। বিশ্বকাপৰ ফাইনেলৰ পিছত ভাৰতীয় ড্ৰেছিং ৰুমৰ পৰিৱেশ কেনেকুৱা আছিল? প্ৰশিক্ষক দ্ৰাবিড়ে এইদৰে কয়- ''ড্ৰেছিং ৰুমলৈ উভতি অহাৰ পিছত ভাৰতীয় ক্ৰিকেটাৰসকল বাকৰুদ্ধ হৈ পৰিল। সকলোৱে মূৰ তললৈ নমাই বহি বহিছিল। নিস্তব্ধ ড্ৰেছিং ৰুমটোত কিছুমান মানুহৰ চকু ঢুলঢুলীয়া হৈ আছিল।’’
ভাৰতীয় দলৰ প্ৰশিক্ষকে কয়- ''ৰোহিতক বৰ হতাশ যেন লাগিছিল। প্ৰায় সকলো ল'ৰা ড্ৰেছিং ৰুমত আছিল। কোনেও নিজকে স্বাভাৱিক কৰি ৰাখিব পৰা নাছিল। তেওঁলোক বৰ আৱেগিক আছিল। সিহঁতৰ ফালে চাব পৰা নাছিলো। ল’ৰাবোৰে সঁচাকৈয়ে বহুত কষ্ট কৰিলে। এটা নিৰ্দিষ্ট লক্ষ্যৰ দিশে আগবাঢ়িছিল। এখন প্ৰতিযোগিতাৰ বাবে নিজৰ সকলোখিনি দিলে। সকলোৱে বহুত ত্যাগ কৰিছে। ইয়াৰ পিছত এনে ফলাফল মানি লোৱাটো বৰ কঠিন হৈ পৰে। কাৰণ এমাহতকৈও অধিক সময় তেওঁলোকে কেনেকৈ ক্ৰিকেট খেলিছিল সেয়া সকলোৱে দেখিছে।’’
খেলৰ অন্তত মানসিক ভাঙি যোৱা খেলুৱৈসকলক দ্ৰাবিড়ে চম্ভালিছিল। নিজৰ হতাশা লুকুৱাই ৰাখি ৰোহিতে কোহলীৰ মূৰত হাত ফুৰায়। ২০০৭ চনত অধিনায়ক হিচাপে দ্ৰাবিড়ে বিশ্বকাপ জয় কৰিব পৰা নাছিল। এইবাৰ প্ৰশিক্ষক হিচাপেও তেওঁ জয়ী হ’ব নোৱাৰিলে।
Continue Reading
