ডিজিটেল ডেস্ক: হাস্পতালত ৰোগীৰ জীৱন বচাবলৈ ঔষধৰ প্ৰয়োজন হয়। কেতিয়াবা জৰুৰীকালীনভাৱে প্ৰয়োজন হোৱা ঔষধৰ বাবে ৰোগীৰ অভিভাৱকৰ মাজত হাহাকাৰ পৰিস্থিতিৰ সৃষ্টি হোৱাও দেখা যায়। কিন্তু ঔষধৰ সলনি মোবাইল ফোন বিচাৰি চিকিৎসকে জৰুৰী পৰিস্থিতি সৃষ্টি কৰা কেতিয়াবা দেখিছেনে? তেনে এটা পৰিস্থিতিয়েই সৃষ্টি হ’ল অন্ধ্ৰ প্ৰদেশত।
বৃহস্পতিবাৰে নিশা প্ৰায় ১০ বজাত এগৰাকী প্ৰসূতিৰ প্ৰসৱ বেদনা আৰম্ভ হোৱাত হাস্পতালত ভৰ্তি কৰা হৈছিল। যথা সময়ত চিকিৎসকে পৰীক্ষা কৰি প্ৰসৱৰ বাবে অপাৰেচন থিয়েটাৰ চমুকৈ অ’টিলৈ প্ৰেৰণ কৰে। কিন্তু তাৰ কিছুসময়ৰ পাছতেই অ’টিৰ বাহিৰত অপেক্ষা কৰি থকা প্ৰসূতিগৰাকীৰ স্বামীক এগৰাকী নাৰ্ছে বৰ জৰুৰীভাৱে কিছু কথা কৈছিল। নাৰ্ছগৰাকীয়ে ব্যক্তিগৰাকীক যিমান পাৰে সিমান মোবাইল ফোন, টৰ্চ আৰু মমবাতি আনিবলৈ কৈছিল। এটা উশাহতে নাৰ্ছে কৈ যোৱা এই কথা শুনি ব্যক্তি গৰাকী বিমোৰত পৰিছিল। হাস্পতালখনত তেওঁৰ কোনো চিনাকী মানুহ নাছিল। নিজৰ হাতত থকা মোবাইল ফোনটো নাৰ্ছগৰাকীৰ হাতত তুলি দি তেওঁ আৰু মোবাইল বিচাৰি পায় নেকি তাৰ সন্ধানত নামি পৰিল।
ঘটনাটো চিকিৎসালয়খনৰ পৰা বিদ্যুতৰ সংযোগ বিচ্চিন্ন হোৱাৰ পাছত সংঘটিত হৈছিল। গোটেই হাস্পতালখন অন্ধকাৰত বুৰ গৈছিল। আন্ধাৰত কেনিও একো নেদেখা অৱস্থা। তেনে সময়তে নাৰ্ছে কৈ যোৱা কথাবোৰ শুনি যেন মানুহজনৰ মূৰত বজ্ৰপাত পৰিছিল। কাৰণ ইতিমধ্যে তেওঁৰ পত্নী অপাৰেচন থিয়েটাত প্ৰসৱ বেদনাত চটফটাই আছিল। পোহৰৰ অভাৱত তেওঁৰ পত্নী আৰু সন্তানৰ জীৱন বিপদত পৰিব পাৰে! এক মুহূৰ্তৰ বাবে চিন্তা নকৰাকৈ, তেওঁ এটা এটাকৈ মোবাইল ফোন উঠোৱাত ব্যস্ত হৈ পৰিল। অৱশেষত ম’বাইল টৰ্চৰ পোহৰত অস্ত্ৰোপচাৰ সফলতাৰে সম্পন্ন হৈছিল।
ঘটনাটো অন্ধ্ৰ প্ৰদেশৰ নৰসীপত্তনমৰ এনটিআৰ চিকিৎসালয়ত সংঘটিত হৈছিল। বিগত কেইদিনমান ধৰি অন্ধ্ৰ প্ৰদেশত বিদ্যুতৰ চৰম নাটনি দেখা গৈছে। ৰাজ্যিক বিদ্যুৎ বিভাগে চাহিদা অনুসৰি যোগান ধৰিব নোৱাৰাৰ বাবে ৫০ শতাংশ বিদ্যুৎ হ্ৰাস কৰাৰ কথা ঘোষণা কৰিছে। কিন্তু চৰকাৰৰ এই সিদ্ধান্তৰ প্ৰভাৱ সাধাৰণ ৰাইজৰ ওপৰত আৰু জৰুৰীকালীন সেৱাৰ ওপৰত কেনেকৈ পৰিছে তাৰে এটা সাধাৰণ উদাহৰণহে এয়া।
