অগ্নিগৰ্ভা নাগালেণ্ড! উত্তেজিত জনতাৰ আক্ৰমণত নিহত সেনা জোৱান, আন ৬জোৱান আহত

ডিজিটেল ডেস্কঃ উত্তপ্ত হৈ পৰিছে নাগালেণ্ড। শনিবাৰে সন্ধিয়া অসম ৰাইফলচৰ নিৰ্বিচাৰ গুলীচালনাৰ ঘটনাত ১২জনকৈ গাঁওবাসী নিহত হোৱা ঘটনাৰ প্ৰতিক্ৰিয়াত উত্তপ্ত হৈ পৰিছে নাগালেণ্ড। শেহতীয়া খবৰ অনুসৰি নাগালেণ্ডৰ মন জিলাত একাংশ উত্তেজিত লোকৰ আক্ৰমণত নিহত হৈছে অসম ৰাইফলছৰ এজন জোৱান। নিহত জোৱানজনক উত্তৰাখণ্ডৰ গৌতম লাল বুলি চিনাক্ত কৰা হৈছে। এই আক্ৰমণৰ ফলত আন ৬জন সেনা জোৱান আহত হোৱা বুলিও জানিব পৰা গৈছে।

উল্লেখ্য যে শনিবাৰে সন্ধিয়া নাগালেণ্ডৰ মন জিলাৰ অ’টিং গাঁৱৰ একাংশ লোকে দৈনিন্দিন কামকাজ সামৰি টিৰু গাঁৱৰ পৰা এখন পিক আপ বাহনত অ’টিঙলৈ উভতি অহাৰ সময়ত বিদ্ৰোহী বুলি সন্দেহ কৰি অসম ৰাইফলচে ধাৰাসাৰ গুলীবৰ্ষণ কৰে। সেনাৰ নিৰ্বিচাৰ গুলীবৰ্ষণৰ ফলত বাহনখনত থকা ১২জনকৈ লোক থিতাতে নিহত হয়। ঘটনাৰ পাছতে উত্তেজিত ৰাইজে ৩খনকৈ বাহন জ্বলাই দিয়ে। প্ৰথমে এই গুলীচালনাৰ ঘটনা কোনো অচিনাকি দুৰ্বৃত্তই কৰিছিল বুলি সন্দেহ কৰা হৈছিল যদিও তদন্তত এই অঘটন অসম ৰাইফলচৰ দ্বাৰা হৈছে বুলি পোহৰলৈ আহে।

বৰ্তমান মন জিলাত অগ্নিগৰ্ভ পৰিস্থিতিৰ সৃষ্টি হৈছে আৰু সাধাৰণ জনতা উত্তেজিত হৈ পৰিছে। ক’হিমাৰ কিছামাত হৰ্নবিল উৎসৱ চলি থকাৰ মাজতে এনে নৃশংস ঘটনাত জাঙুৰ খাই উঠিছে ৰাজ্যখনৰ নগা জাতীয় সংগঠনসমূহ। মৃতকৰ সংখ্যা বৃদ্ধি পোৱাৰ সম্ভাৱনা। জানিব পৰা মতে অসম ৰাইফলচে অতৰ্কিতে এই আক্ৰমণ চলাই যাৰ বাবে পৰিস্থিতি উত্তপ্ত হৈ পৰে। পৰিস্থিতি নিয়ন্ত্ৰণৰ বাবে পুনৰ গুলী চলাব লগীয়া হয়। প্ৰাপ্ত খবৰ অনুসৰি, নগা যুৱক কেইজনে কয়লা খননৰ কাম কৰে আৰু তেওঁলোকে ঘৰলৈ উভতি অহাৰ পথতেই এই আক্ৰমণ হয়। অসম ৰাইফলছে বিদ্ৰোহীৰ সন্দেহত তেওঁলোকৰ ওপৰত নিৰ্বিচাৰ গুলীবৰ্ষণ কৰে।