অহা বছৰৰ এছিয়া কাপ ভাৰতত হ’ব, ২০২৭ চনত বাংলাদেশে আয়োজন কৰিব, এছিয়ান ক্ৰিকেট সন্থাৰ ঘোষণা

ডিজিটেল ডেস্কঃ অহা বছৰ ভাৰতত অনুষ্ঠিত হ’ব এছিয়া কাপ। ইয়াৰ দুবছৰৰ পিছত অৰ্থাৎ ২০২৭ চনত বাংলাদেশে এই প্ৰতিযোগিতা আয়োজন কৰিব। ভাৰতৰ প্ৰতিযোগিতা টি-২০ ফৰ্মেটত হ’ব, বাংলাদেশৰ প্ৰতিযোগিতা ৫০ অভাৰ ফৰ্মেটত হ’ব। সোমবাৰে এই কথা ঘোষণা কৰে এছিয়ান ক্ৰিকেট সন্থা বা এচিচিয়ে।

২০২৬ চনত পুনৰ অনুষ্ঠিত হ’ব টি-২০ বিশ্বকাপ। সেই কথা মনত ৰাখি অহা বছৰ টি-২০ ফৰ্মেটত এছিয়া কাপৰ আয়োজন কৰা হ’ব। আকৌ ২০২৭ চনৰ একদিনীয়া বিশ্বকাপৰ কথা মনত ৰাখি এছিয়া কাপ ৫০ অভাৰৰ হ’ব। ভাৰত, বাংলাদেশ, শ্ৰীলংকা, পাকিস্তান, আফগানিস্তান আৰু আন এখন যোগ্যতা অৰ্জন কৰা দেশে দুয়োখন প্ৰতিযোগিতাতে খেলিব। মুঠ ১৩খন খেল অনুষ্ঠিত হ’ব।

মন কৰিবলগীয়া যে ৩৪ বছৰৰ পাছত ভাৰতলৈ ঘূৰি আহিছে এছিয়া কাপ। ভাৰতে এতিয়ালৈকে মাত্ৰ এবাৰহে এছিয়া কাপ আয়োজন কৰিছে। সেইটো আছিল ১৯৯০-৯১ চনৰ। যোৱা এছিয়া কাপটো হাইব্ৰিড মডেলত অনুষ্ঠিত হৈছিল। ভাৰতে শ্ৰীলংকাত তেওঁলোকৰ মেচ খেলিছিল। যদিও পাকিস্তান আয়োজক আছিল, ভাৰতে সেই দেশলৈ যাবলৈ অস্বীকাৰ কৰিছিল। ফলত এতিয়া প্ৰশ্ন হয় পাকিস্তানে অহা বছৰ এছিয়া কাপ খেলিবলৈ ভাৰতলৈ আহিব নে নাই।