ঐ ৰাম জেনিফাৰ আইদেউৰ বিয়াহে... লুচী ভাজি নে চিৰা দৈ... বিল গেইটছৰ কন্যাৰ বিয়াত ?

ডিজিটেল ডেস্কঃ বিশ্বৰ ধনাঢ্য লোকসকলৰ ভিতৰত অন্যতম বিল গেইটছ আৰু মেলিন্দা গেইটছৰ কন্যাৰ ৰাজকীয় বিবাহ অনুষ্ঠানে চমকিত কৰি তুলিছে বিশ্ববাসীক। মাইক্ৰ’ছফ্টৰ সহ-প্ৰতিষ্ঠাপকগৰাকীয়ে নিজৰ অৰ্থবলেৰে বিশ্বক দীৰ্ঘকাল বশীভূত কৰি ৰাখিছে। সেইগৰাকী বিল গেইটছৰ কন্যাৰ বিবাহ ৰাজকীয় হোৱাটো স্বাভাৱিক। অৱশ্যে জাকজমকীয়াকৈ বিবাহ অনুষ্ঠান আয়োজিত হ’লেও খাদ্যৰ তালিকাত নাছিল কোনোধৰণৰ বিলাসী খাদ্যসম্ভাৰ। ঘৰুৱা ব্যঞ্জনেৰে আপ্যায়ন কৰা হৈছিল আমন্ত্ৰিত অতিথিসকলক।

উল্লেখযোগ্য যে, বিল গেইটছৰ কন্যা জেনিফাৰৰ দৰা হ’ল ইজিপ্তৰ ইকুয়েষ্ট্রিয়ান নায়েল নাছিৰ। বিশ্ব ঘোঁৰাচালনা প্ৰতিযোগিতাৰ চিনাকি মুখ নাছিৰৰ সৈতে ২০১৭ চনত চিনাকি হৈছিল জেনিফাৰ। ‘ষ্টেনফ’ৰ্ড বিশ্ববিদ্যালয়’ত পঢ়ি থকাৰ সময়ৰেপৰাই দুয়োৰে মাজত আছিল প্ৰেম। বিগত বছৰত আনুষ্ঠানিকভাৱে বাগদান কাৰ্য সম্পন্ন হোৱাৰ পাছত সোমবাৰে নিউয়ৰ্কত বিবাহ সম্পন্ন হয় জেনিফা আৰু নাছিৰৰ। বিগত টকিঅ’ অলিম্পিকৰ ইকুয়েষ্ট্রিয়ানত প্রতিনিধিত্ব কৰা নাছিৰক জীৱনসংগী হিচাপে পাই খুবেই সুখী জেনিফাৰ।

বিবাহক ‘পৰীৰ দেশৰ সাধু’- বুলি অভিহিত কৰিছে জেনিফাৰ গেইটছে। বিবাহ অনুষ্ঠানত জেনিফাৰে পৰিধান কৰা পোছাকযোৰেও বৰ্তমান সময়ত যথেষ্ট চৰ্চা লাভ কৰিছে। উল্লেখযোগ্য যে, ‘বিবাহ অনুষ্ঠানত ক’ভিডৰ প্ৰতিষেধক গ্ৰহণ কৰা ব্যক্তিকহে প্ৰৱেশৰ অনুমতি প্ৰদান কৰা হৈছিল…’- বুলিও খবৰ ওলাইছে।