অ’মিক্ৰনৰ সংখ্যা বৃদ্ধি: সাৱধান নহ’লে ব্ৰিটেইনৰ দৰে হ’ব পাৰে ভাৰতৰ অৱস্থা

ডিজিটেল ডেস্ক: অ'মিক্ৰনক লৈ চিন্তাত পৰিছে এইমছৰ সঞ্চালক৷ ক’ভিডৰ দৰেই অ’মিক্ৰনৰো দ্ৰুতসংক্ৰমণে ভাৰতত ভয়ংকৰ বিপদ ঘটাব পাৰে৷ বিগত ২৪ ঘণ্টাত ব্ৰিটেইনত প্ৰায় দহ-সহস্ৰাধিক লোক অ’মিক্ৰনত আক্ৰান্ত হোৱাৰ পাছতে হাহাকাৰ পৰিস্থিতিৰ সৃষ্টি হৈছে। ব্ৰিটেইনত অ’মিক্ৰনৰ সংক্ৰমণ বৃদ্ধি হোৱাৰ প্ৰতি লক্ষ্য ৰাখি ভাৰতকো যিকোনো পৰিস্থিতিৰ বাবে সাজু থাকিবলৈ আহ্বান এইমছৰ সঞ্চালক ডাঃ ৰণদীপ গুলেৰিয়াৰ।

এইমছৰ সঞ্চালকগৰাকীয়ে কয় যে, “পৃথিৱীৰ অন্য প্ৰান্তত বৃদ্ধি হোৱা এই ঘটনাসমূহৰ নিৰীক্ষণ কৰি বৰ্তমান যিকোনো পৰিস্থিতিৰ বাবে ভাৰতবৰ্ষও সাজু থকাটো প্ৰয়োজন।” লগতে ক’ভিডৰ দৰে অ’মিক্ৰনৰ প্ৰভাৱত ব্ৰিটেইনৰ দৰে ভাৰতৰ পৰিস্থিতি বেয়া নহওক বুলিও আশা প্ৰকাশ কৰে।

উল্লেখ্য যে, গুজৰাটত নতুনকৈ ২টা অ’মিক্ৰনৰ ঘটনা ধৰা পৰাৰ পাছতে ভাৰতত আক্ৰান্তৰ সংখ্যা ১৪৫লৈ বৃদ্ধি পায়। বৰ্তমানলৈকে মহাৰাষ্ট্ৰত ৪৮জন, দিল্লীত ২২জন, ৰাজস্থানত ১৭জন, কৰ্ণাটকত ১৪জন, তেলেংগানাত ২০জন, গুজৰাটত ৯জন, কেৰালাত ১১জন, অন্ধ্ৰ প্ৰদেশত এজন, চণ্ডীগড়ত এজন, তামিলনাডুত এজন আৰু পশ্চিম বংগত এজন ব্যক্তিৰ শৰীৰত ধৰা পৰিছে অ’মিক্ৰন।

ইফালে, ব্ৰিটেইনত মুঠ অ’মিক্ৰনত আক্ৰান্তৰ সংখ্যা ২৫,০০০ৰো অধিক। বিগত ২৪ ঘণ্টাত ব্ৰিটেইনত অ’মিক্ৰনৰ ফলত মৃত্যু হয় ৬ জনৰ আৰু ১২০০ লোক আক্ৰান্ত হয়।