অমিত শ্বাহৰ ফটো আপলোড কৰি বিপদত অৱসৰপ্ৰাপ্ত ভাৰতীয় সেনা

ডিজিটেল ডেস্ক: কেন্দ্ৰীয় গৃহমন্ত্ৰী অমিত শ্বাহৰ ফটো ফেচবুকত আপলোড কৰাই অপৰাধ হ’ল এজন ব্যক্তিৰ। ব্যক্তিজন ভাৰতীয় সেনাৰ এজন অৱসৰপ্ৰাপ্ত জোৱান। ফেচবুকত আপলোড কৰা অমিত শ্বাহৰ ফটোৰ বাবেই তেওঁৰ ওপৰত ৰুজু কৰা হৈছে গোচৰ। ফেব্ৰুৱাৰীত কেন্দ্ৰীয় গৃহমন্ত্ৰী অমিত শ্বাহৰ আপত্তিজনক(?) আলোকচিত্ৰ ফেচবুকত পোষ্ট কৰাৰ অভিযোগত ৰামপুৰত এজন ৪৫ বছৰীয়া অৱসৰপ্ৰাপ্ত সেনা জোৱানৰ বিৰুদ্ধে গোচৰ ৰুজু কৰা হৈছে। আৰক্ষীয়ে কৈছিল যে দুদিন আগতে তেওঁলোকক জনোৱা হৈছিল যে এজন অৱসৰপ্ৰাপ্ত সেনা জোৱানে ২০১৯ চনৰ পুলৱামা আক্ৰমণৰ সন্দৰ্ভত তেওঁৰ ফেচবুক একাউণ্টত চাৰিখন ফটো আপলোড কৰিছিল। তাৰে এখন ফটোত কেন্দ্ৰীয় মন্ত্ৰী অমিত শ্বাহৰ মুখখন ক'লা ৰঙ লাগি থকা দেখিবলৈ পোৱা গৈছিল। যাৰ বাবেই তেওঁৰ বিৰুদ্ধে এতিয়া এজাহাৰ দাখিল কৰা হৈছে। নৰেন্দ্ৰ কুমাৰৰ বিৰুদ্ধে ভাৰতীয় দণ্ডবিধিৰ ধাৰা ৫০৫-২, ৫০০ আৰু ৫০১ৰ অধীনত গোচৰ ৰুজু কৰা হৈছে। ভাৰতীয় দণ্ডবিধি আইনৰ মতে এই ধাৰা কেইটাই শ্ৰেণীসমূহৰ মাজত শত্ৰুতা, ঘৃণা বা বিদ্বেষ সৃষ্টি কৰা বা প্ৰচাৰ কৰা বিবৃতি, কোনো ব্যক্তিৰ মানহানি আৰু মানহানিকৰ বিষয় মুদ্ৰণ কৰা অপৰাধ সূচায়। এছ.এইচ.ও. (শ্বাহবাদ) সঞ্জয় তোমাৰে কৈছিল যে যিহেতু কুমাৰৰ বিৰুদ্ধে গোচৰ ৰুজু কৰা অভিযোগৰ অধীনত সৰ্বাধিক সাত বছৰৰ তলৰ শাস্তি আছে, আৰক্ষীয়ে তেওঁক গ্ৰেপ্তাৰ কৰা নাছিল। তেওঁ জানিবলৈ দিয়ে যে, ‘তেওঁৰ বিৰুদ্ধে পঞ্জীয়ন কৰা গোচৰটোৰ বিষয়ে অৱগত কৰি তেওঁক এখন জাননী জাৰি কৰা হৈছে। আৰক্ষীয়ে তেওঁৰ চেলফোনটো জব্দ কৰিছে আৰু পৰীক্ষাৰ বাবে পৰীক্ষাগাৰলৈ প্ৰেৰণ কৰিব।’