অমিতাভ বচ্চনৰ পৰা প্ৰভাসলৈকে বহু অভিনেতাক দেখা গ’ল “ হৰ ঘৰ ত্ৰিৰংগা ” ভিডিঅ’ত

লগতে উক্ত কেপচনত ত্ৰিৰংগাক ৭৫ বছৰীয়া গৌৰৱ আৰু ঐক্যৰ প্ৰতীক বুলিও অভিহিত কৰা হৈছে৷

ডিজিটেল ডেস্ক: ভাৰতবৰ্ষই ইতিমধ্যে স্বাধীনতাৰ ৭৫ বছৰ অতিক্ৰম কৰিলে৷ স্বাধীনতাৰ ৭৫ বছৰ উপলক্ষে দেশজুৰি পালন কৰা হৈছে আজাদী কা অমৃত মহোৎসৱ৷ এই

আজাদী কা অমৃত মহোৎসৱক সফল কৰি তুলিবলৈ চৰকাৰৰ তৰফৰ পৰা বহু কাৰ্যসূচী হাতত লোৱা হৈছে৷ “হৰ ঘৰ ত্ৰিৰংগা” হৈছে  আজাদী কা অমৃত মহোৎসৱৰে এক অন্যতম কাৰ্যসূচী৷ চৰকাৰে ভাৰতবৰ্ষৰ প্ৰত্যেকখন ঘৰতে ভাৰতবৰ্ষৰ জাতীয় পতাকা  উত্তোলন কৰি এই কাৰ্যসূচীক সফল কৰি তুলিবলৈ অনুৰোধ জনাইছে৷

শেহতীয়াভাৱে স্বাধীনতাৰ ৭৫ টা বৰ্ষ আৰু ভাৰতবৰ্ষ কৃষ্টি-সংস্কৃতি, ভাৰতীয়  ইতিহাস প্ৰতিফলিত কৰিবলৈ ভাৰতবৰ্ষৰ সাংস্কৃতিক মন্ত্ৰালয়ে “হৰ  ঘৰ ত্ৰিৰংগা ” শীৰ্ষক এটি ভিডিঅ’ নিৰ্মাণ কৰিছে৷ ভিডিঅ’টোত অমিতাভ বচ্চন, কপিল দেৱ,বিৰাট কোহলী, অনুপম খেৰ আদি জনপ্ৰিয় ব্যক্তিক দেখিবলৈ পোৱা গৈছে৷ ভাৰতবৰ্ষৰ সাংস্কৃতিক মন্ত্ৰালয়ৰ অফিচিয়েল টুইটাৰ একাউণ্ট এই বিশেষ ভিডিঅ’টো প’ষ্ট কৰা হৈছে৷ আৰু ভিডিঅ’টি প’ষ্ট কৰি সাংস্কৃতিক মন্ত্ৰালয়ে লিখিছে যে,  “ হৰ ঘৰ ত্ৰিৰংগা, ঘৰ ঘৰ ত্ৰিৰংগা ৷ ” লগতে উক্ত কেপচনত ত্ৰিৰংগাক ৭৫ বছৰীয়া গৌৰৱ আৰু ঐক্যৰ প্ৰতীক বুলিও অভিহিত কৰা হৈছে৷

এই ভিডিঅ’টোত ভাৰতৰ বৈচিত্ৰ্যতাৰ সৌন্দৰ্যক প্ৰতিফলিত কৰা হৈছে৷ সুদক্ষ অভিনেতা অমিতাভ বচ্চনে ভিডিঅ’টোত কন্ঠদান কৰিছে৷ দক্ষিণ ভাৰতৰ অভিনেতা সকলৰ ভিতৰত একমাত্ৰ প্ৰভাসেই এই ভিডিঅ’ত অংশ লৈছে৷ইয়াৰোপৰি,  ভিডিঅ’টোৰ শেষৰফালে প্ৰধানমন্ত্ৰী নৰেন্দ্ৰ মোদীকো দেখা গৈছে৷