অন্ধ্ৰপ্ৰদেশত প্ৰবল বৃষ্টিপাত: নিহত ৪৪, সন্ধানহীন ১৬

ডিজিটেল ডেস্ক : অন্ধ্ৰপ্ৰদেশৰ চাৰিখন জিলাত যোৱা এসপ্তাহ ধৰি হৈ থকা প্ৰবল বৃষ্টিপাতৰ ফলত ৪৪ গৰাকী লোক নিহত হোৱাৰ লগতে ১৬গৰাকী লোক সন্ধানহীন হৈ থকা বুলি জানিব পৰা গৈছে৷ অন্ধ্ৰপ্ৰদেশ চৰকাৰে প্ৰকাশ কৰা এক প্ৰেছ বিজ্ঞপ্তিত ৰাজ্যখনৰ চাৰিখন জিলা কাডাপা, চিত্তুৰ, অনন্তপুৰ আৰু নেলোড়ৰ মুঠ ১৯৯০খন গাঁও বৃষ্টিপাতৰ কবলত পৰিছে বুলি সদৰি কৰিছে৷ চলিত মাহৰ প্ৰথম সপ্তাহতে আৰম্ভ হোৱা নেৰানেপেৰা বৰষুণৰ ফলত জিলাকেইখনৰ বাট-পথৰ বিস্তৰ ক্ষতি হোৱাৰ লগতে যান-বাহনৰো ক্ষতিসাধন কৰিছে৷ ১৬-১৭ নৱেম্বৰৰ পৰা আৰম্ভ হোৱা এইধৰণৰ প্ৰবল বৃষ্টিপাত ৰাজ্যখনত পূৰ্বতে কেতিয়াও হোৱা নাই বুলি ৰাজ্য চৰকাৰে প্ৰকাশ কৰিছে৷

প্ৰবল বৃষ্টিপাতে সৃষ্টি কৰা বানৰ ফলত নাডালুৰু দলঙৰ পৰা পথ পৰিবহন নিগমৰ এখন বাছ উটি যোৱাত ১০ গৰাকী লোকৰ মৃত্যু হৈছিল। বাছখনত থকা আন লোকসকলক SDRF বাহিনীয়ে উদ্ধাৰ কৰিবলৈ সক্ষম হয়৷ আন ১০গৰাকী লোকৰ মৃতদেহ চিভালায়মৰ নদীৰ পাৰত উদ্ধাৰ কৰা হয়৷ বৃষ্টিপাতজনিত এই বিপৰ্যয়ত ৰাজ্যখনৰ ক্ষতিগ্ৰস্ত ঘৰৰ পুনঃনিৰ্মাণৰ বাবে প্ৰতিটো পৰিয়ালক ১ লাখ ৮০ হাজাৰ টকাকৈ অৰ্থসাহায্য প্ৰদানৰ কথা ঘোষণা কৰিছে ৰাজ্য চৰকাৰে৷ লগতে, বানত যিসমূহ পৰিয়ালৰ পশু ধনৰ মৃত্যু হৈছে, তেওঁলোককো ৰাজ্য চৰকাৰে ৯৫,০০০ টকাৰ এককালীন সাহায্য ঘোষণা কৰিছে৷

ইয়াৰ পূৰ্বে ৰাজ্য চৰকাৰে বানৰ কবলত পৰা চাৰিখন জিলাৰ ক্ষতিগ্ৰস্ত লোকসকলক ২৫ কিলোগ্ৰামকৈ চাউল, ১ লিটাৰকৈ তেল, ১ কিলোগ্ৰামকৈ পিয়াঁজ আৰু ১ কিলোগ্ৰামকৈ আলু দিয়া হ’ব বুলি বিজ্ঞপ্তিত প্ৰকাশ৷ ৰাজ্য চৰকাৰে এইক্ষেত্ৰত যোগান বিভাগৰ আয়ুক্ত আৰু অৱসৰপ্ৰাপ্ত বিষয়াক অত্যাৱশ্যকীয় সামগ্ৰী বিতৰণত তদাৰক কৰিবলৈ দায়িত্ব অৰ্পণ কৰিছে৷