অংগক্ষত কৰা হ’ব মহাৰাষ্ট্ৰৰ! কেন্দ্ৰই কাঢ়ি ল’ব মুম্বাই!

ডিজিটেল ডেস্ক : যেন কাঢ়ি ল’ব বিচৰা হৈছে শিৰৰ মুকুট! অংগক্ষত কৰি তুলিব খোজা হৈছে পংগু। মুম্বাইবিহীন মহাৰাষ্ট্ৰ এখনৰ কল্পনা কৰিব পাৰিনে? কিন্তু এতিয়া তেনে এক আশংকাৰ কথাই ব্যক্ত কৰা হৈছে। কেন্দ্ৰীয় চৰকাৰ আৰু মহাৰাষ্ট্ৰৰ শিৱসেনা নেতৃত্বৰ মিত্ৰজোঁট চৰকাৰৰ মাজৰ সংঘাতে তীব্ৰ ৰূপ ধাৰণ কৰাৰ সময়তে এতিয়া এক গুৰুতৰ আশংকাৰ কথা ব্যক্ত কৰিছে শিৱসেনাৰ মুখপাত্ৰ সঞ্জয় ৰাউটে।

মহাৰাষ্ট্ৰৰ পৰা মুম্বাইক পৃথক কৰাৰ বাবে কেন্দ্ৰীয় চৰকাৰে চেষ্টা কৰি থকা বুলি অভিযোগ কৰিছে শিৱসেনাৰ মুখপাত্ৰ তথা সাংসদ সঞ্জয় ৰাউটে। তেওঁ আজি অভিযোগ কৰে যে, মুম্বাইক পৃথক কৰি কেন্দ্ৰই ইয়াৰ ওপৰত নিজৰ নিয়ন্ত্ৰণ সাব্যস্ত কৰিব বিচাৰিছে। তেওঁ অভিযোগ কৰা অনুসৰি ‘বিল্ডাৰৰ লবী’ আৰু বাৰানসীৰ এজন লোক এই ষড়যন্ত্ৰত চামিল হৈ আছে। তেওঁ নিৰ্মাণখণ্ডৰে জড়িত এই শক্তিশালী লোকসকলৰ নাম ল’বলৈ অস্বীকাৰ কৰে আৰু কয় যে, এতিয়া মহাৰাষ্ট্ৰৰ শাসকীয় দল শিৱসেনাৰ বদনাম ৰটিবলৈ চেষ্টা কৰি থকা হৈছে। বিজেপি নেতা কিৰিট সৌম্যাও ইয়াৰ অংশীদাৰ হৈ আছে। তেওঁ সজোৰে এই দাবী কৰে যে, পৃথক মুম্বাইৰ ষড়যন্ত্ৰ এতিয়া তুংগত উঠিছে আৰু শীঘ্ৰেই এই সম্পৰ্কীয় এক প্ৰতিবেদন কেন্দ্ৰীয় গৃহ বিভাগৰ হাতত দাখিল কৰা হ’ব।

ৰাজ্য চৰকাৰক চাপত ৰাখিবলৈ বিভিন্নজন নেতা-মন্ত্ৰীৰ বিৰুদ্দে কেন্দ্ৰীয় সংস্থাৰ তদন্ত আৰম্ভ কৰা কেন্দ্ৰীয় চৰকাৰে চৰকাৰখনক চাপত ৰাখিবলৈ সৰ্বতোপ্ৰকাৰৰ চেষ্টা চলাইছে। এনে প্ৰচেষ্টাৰ মাজতে এতিয়া কেন্দ্ৰীয় চৰকাৰে মুম্বাইক পৃথক কৰি ৰাজ্যখনৰ ক্ষমতা তথা গৰিমা হ্ৰাসৰ চেষ্টা কৰা বুলি অভিযোগ উঠাতো তাৎপৰ্যপূৰ্ণ বিষয় বিবেচিত হৈছে।