ডিজিটেল ডেস্কঃ সঠিকভাৱে ব্যৱহাৰ কৰিলে পৃথিৱীৰ সকলোবোৰ বস্তুতেই ঔষধি গুণ থকা বুলি কয় আয়ুৰ্বেদে। গাই গৰুৰ প্ৰস্ৰাৱৰ উপকাৰিতা সম্পৰ্কে ভাৰতত চলি আহিছে বিতৰ্ক। কিন্তু যদি মানুহে মানুহৰ প্ৰস্ৰাৱ পান কৰে তেন্তে কি হ'ব? এই বিষয়ে বিভিন্ন মহলত প্ৰতিক্ৰিয়া অব্যাহত আছে। কিন্তু শেহতীয়াকৈ, ব্ৰিটেইনৰ যুৱক হেৰী মাটাদিনে সংবাদ শিৰোনাম দখল কৰা দেখা গৈছে। নিয়মীয়া প্ৰস্ৰাৱ পান কৰা বাবেই জীৱনত হতাশাৰ দৰে গুৰুতৰ ৰোগৰ পৰা আৰোগ্য লাভ কৰিছে বুলি জনাইছে হেৰী মাটাদিনে।
উল্লেখ্য যে, হেৰীৰ বয়স এতিয়া ৩৪ বছৰ। তেওঁ ইংলেণ্ডৰ হেম্পশায়াৰৰ বাসিন্দা। হেৰীয়ে কয়, ‘এটা সময়ত মই হতাশাত ভুগিছিলো।২০১৬ চনৰ পৰা মই নিজৰ প্ৰস্ৰাৱ পান কৰা আৰম্ভ কৰিছিলো। তেতিয়াৰে পৰা মই মানসিক ৰোগৰ পৰা আৰোগ্য লাভ কৰিছো।’ জানিবলৈ পোৱা মতে, ৰোগৰ পৰা আঁতৰি থাকিবলৈ পুৱা খালী পেটত প্ৰস্ৰাৱ পান কৰে হেৰীয়ে। প্ৰতিদিনে ২০০ মিঃলিঃ প্ৰস্ৰাৱ পান কৰে হেৰীয়ে।
মূত্ৰপানৰ উপকাৰিতাৰ বিষয়ে নিশ্চিত নহয় চিকিৎসকসকল। কিন্তু আত্মবিশ্বাসী হেৰী। তেওঁ কয়, ‘যেতিয়া মই মূত্ৰপান কৰো, তেতিয়া মই শান্তি অনুভৱ কৰোঁ। মই নিজই আচৰিত হওঁ, টকা খৰচ নকৰাকৈয়ে ইমান উপকাৰিতা লাভ কৰিছো। এয়া সঁচাকৈয়ে অবিশ্বাস্য! যেতিয়াৰ পৰা মই এই থেৰাপী কৰিবলৈ লৈছো,তেতিয়াৰ পৰা মোৰ ভাগৰ নাইকিয়া হৈ গৈছে। যুৱকজনে লগতে কয়, ‘প্ৰতিদিনে প্ৰস্ৰাৱৰে মুখ ধুলে ডেকা হৈ থাকিব পাৰি।’
মন কৰিবলগীয়া যে, এই অভ্যাস গঢ় দিবলৈ হেৰীয়ে বহুতো ত্যাগ কৰিব লগা হৈছে। যেতিয়াৰ পৰা প্ৰস্ৰাৱ পান কৰাৰ অভ্যাস কৰিছে,তেতিয়াৰে পৰাই আত্মীয়-বন্ধুবৰ্গই সংগ ত্যাগ কৰিছে হেৰীৰ। আনকি নিজৰ ভগ্নীয়েও হেৰীৰ সৈতে কথা নাপাতে। তথাপি, অলৰ-অচৰ হেৰী।সতেজ প্ৰস্ৰাৱৰ এক প্ৰকাৰৰ প্ৰাকৃতিক গোন্ধ থাকে বুলিও কয় হেৰীয়ে।
Continue Reading
