অৱশেষত মুকলি আকাশৰ তললৈ মাৰাডোনাৰ ঘড়ী চুৰিৰ অভিযোগত গ্ৰেপ্তাৰ হোৱা ৱাজিদ হুছেইন

ডিজিটেল ডেস্ক: কিম্বদন্তি ফুটবলাৰ ডিয়েগো মাৰাডোনাৰ ঘড়ী চুৰি কৰাৰ অভিযোগত কেইমাহমান পূৰ্বে অভিযোগত গ্ৰেপ্তাৰ হোৱা শিৱসাগৰৰ ৱাজিদ হুছেইনে জামিন লাভ কৰিছে৷ ৱাজিদৰ জামিনৰ পাছতেই ফাদিল হ’ল শিৱসাগৰ আৰক্ষীৰ মিথ্যাচাৰ৷ বিগত ২ মাহে শিৱসাগৰ আৰক্ষীয়ে আদালতত দাখিল কৰিব নোৱাৰিলে চাৰ্জশ্বিট৷ আৰৱৰ পৰা মাৰাডোনাৰ ঘড়ী চুৰিৰ কোনো নথি-পত্ৰ আৰু তথ্য আদালতত জমা দিব নোৱাৰিলে শিৱসাগৰ আৰক্ষীয়ে৷ অথচ, ৯ ডিচেম্বৰত মাৰাডোনাৰ ঘড়ী চুৰি কৰা ৱাজিদ হুছেইনক গ্ৰেপ্তাৰৰ সময়ত ডুবাই আৰক্ষীয়ে অসম আৰক্ষীক যোগাযোগ কৰা বুলিও সংবাদমেলত সদম্ভে ঘোষণা কৰিছিল শিৱসাগৰ জিলা আৰক্ষী অধীক্ষক ৰাকেশ ৰোচনে৷ আৰক্ষী অধীক্ষকগৰাকীয়ে আনকি সেয়া শিৱসাগৰ আৰক্ষীৰ বৃহৎ সফলতা বুলিও সংবাদ মাধ্যমযোগে সদৰী কৰিছিল৷ অসম আৰক্ষীৰ সহযোগত ডুবাই আৰক্ষীয়ে চৰাইদেউ জিলাৰ মৰাণহাটৰ পৰা ৱাজিদ হুছেইনক গ্ৰেপ্তাৰ কৰা বুলি টুইটযোগে সদৰী কৰিছিল অসম আৰক্ষীৰ বিশেষ সঞ্চালকপ্ৰধান জিপি সিঙেও৷ টুইটযোগে অসমৰ মূখ্যমন্ত্ৰীয়েও আৰক্ষীয়ে মাৰাডোনাৰ ঘড়ী উদ্ধাৰৰ বিষয়টোত প্ৰতিক্ৰিয়া ব্যক্ত কৰিছিল৷ উল্লেখ্য যে, International Cooperation Act অনুসৰি Indian Federal LEAৰ জৰিয়তে অসম আৰক্ষীয়ে ডুবাই আৰক্ষীক মাৰাডোনাৰ ঘড়ী চুৰিত জড়িত ৱাজিদক কৰায়ত্ত কৰা বুলিও দাবী কৰিছিল শিৱসাগৰ আৰক্ষীয়ে৷ কিন্তু, দুমাহেও ডুবাই আৰক্ষীৰ কোনো তথ্য তথা ঘড়ী চুৰিৰ সম্পৰ্কত ভাৰত চৰকাৰলৈ প্ৰেৰণ কৰা পত্ৰকে ধৰি কোনো তথ্য আদালতত দাখিল কৰিব নোৱাৰিলে আৰক্ষীয়ে৷ যাৰবাবে আজি আদালতে জামিনত মুকলি কৰি দিয়ে ৱাজিদ হুছেইনক৷