অসমত শগুণ সংৰক্ষণত এক নতুন দিগন্ত: বিশ্বৰ প্ৰথম সৰুঠোঁটৰ শগুণ বনলৈ মুকলি

অসমৰ বন্যপ্ৰাণী সংৰক্ষণৰ ক্ষেত্ৰত এক ঐতিহাসিক ক্ষণ আহি পৰিছে, য'ত বিশ্বৰ ভিতৰতে প্ৰথমবাৰৰ বাবে বন্দী অৱস্থাত প্ৰজনন কৰা সৰুঠোঁটৰ শগুণ বনলৈ মুকলি কৰা হৈছে। শুক্ৰবাৰে কাজিৰঙা ৰাষ্ট্ৰীয় উদ্যান আৰু ব্যাঘ্ৰ সংৰক্ষিত বনাঞ্চলৰ বিশ্বনাথ বন্যপ্ৰাণী সংমণ্ডলত মুঠ দহটা শগুণ মুকলি কৰা হয়। ইয়াৰ ভিতৰত পাঁচটা সৰুঠোঁটৰ শগুণ আৰু পাঁচটা বগা পিঠিৰ শগুণ আছিল। এই গুৰুত্বপূৰ্ণ পদক্ষেপ অসম বন বিভাগ আৰু বোম্বাই নেচাৰেল হিষ্টৰী ছ'চাইটি (BNHS) ৰ যুটীয়া প্ৰচেষ্টাত সম্পন্ন হৈছে।

এই শগুণসমূহক 'চফট ৰিলিজ' (Soft Release) নামৰ এক বৈজ্ঞানিক পদ্ধতিৰে বনলৈ মুকলি কৰা হৈছিল, যাৰ উদ্দেশ্য হৈছে পক্ষীসমূহক লাহে লাহে প্ৰাকৃতিক পৰিৱেশৰ লগত খাপ খুৱাবলৈ সহায় কৰা। গুৱাহাটীৰ উপকণ্ঠৰ ৰাণীস্থিত শগুণ সংৰক্ষণ প্ৰজনন কেন্দ্ৰৰ পৰা এই পক্ষীসমূহক বিশ্বনাথ বন্যপ্ৰাণী সংমণ্ডলৰ এক পক্ষীশাললৈ স্থানান্তৰ কৰা হৈছিল। তিনিমাহ ধৰি সেই পক্ষীশালত ৰখাৰ পিছত সিহঁতক বনৰীয়া পৰিৱেশৰ সৈতে খাপ খুৱাবলৈ সুযোগ দিয়া হৈছিল।

শগুণ মুকলি অনুষ্ঠানত উপস্থিত থাকি অসমৰ বনমন্ত্ৰী জয়ন্ত মল্লবৰুৱাই কয় যে, এই পক্ষীসমূহৰ সংৰক্ষণ প্ৰজনন কেন্দ্ৰৰ পৰা বনলৈ যাত্ৰাই বন্যপ্ৰাণী সংৰক্ষণৰ বাবে কেইবা বছৰৰ নিৰলস প্ৰচেষ্টা আৰু নিষ্ঠাক প্ৰতিফলিত কৰিছে। তেওঁ লগতে কয়, "এই পক্ষীসমূহে বহু বছৰৰ ধৈৰ্য্যশীল সংৰক্ষণ, বৈজ্ঞানিক যত্ন আৰু অটল প্ৰতিশ্ৰুতিৰ প্ৰতীক। এতিয়া সিহঁত মুকলি আকাশত উৰি ফুৰিব, আৰু উপগ্ৰহ ট্ৰেকিংৰ জৰিয়তে আমি সিহঁতৰ গতিবিধি নিৰীক্ষণ কৰিব পাৰিম। ই এই মহৎ ভক্ষক প্ৰাণীবোৰৰ পুনৰুত্থান আৰু এক সুস্থ পৰিৱেশ তন্ত্ৰৰ বাবে আশা কঢ়িয়াই আনিব।"

এই পদক্ষেপ শগুণৰ সংখ্যা বৃদ্ধি আৰু পৰিৱেশ তন্ত্ৰত সিহঁতৰ গুৰুত্বপূৰ্ণ ভূমিকা পুনৰ প্ৰতিষ্ঠা কৰাৰ দিশত এক বৃহৎ সফলতা বুলি বিবেচিত হৈছে। অসমৰ এই প্ৰচেষ্টাই বিশ্বৰ অন্যান্য দেশসমূহকো শগুণ সংৰক্ষণৰ বাবে অনুপ্ৰাণিত কৰিব বুলি আশা কৰা হৈছে।