অসুস্থ লালু প্ৰসাদ যাদৱ; উন্নত চিকিৎসাৰ বাবে এয়াৰ এম্বুলেঞ্চেৰে দিল্লী এইমছলৈ নিয়াৰ সম্ভাৱনা

ডিজিটেল ডেস্কঃ অসুস্থ হৈ পৰিছে লালু প্ৰসাদ যাদৱ। বিহাৰৰ প্ৰাক্তন মুখ্যমন্ত্ৰী তথা ৰাষ্ট্ৰীয় জনতা দলৰ (আৰজেডি) মুৰব্বী লালু প্ৰসাদৰ স্বাস্থ্যৰ যথেষ্ট অৱনতি ঘটিছে। বিগত কিছুদিনৰে পৰা স্বাস্থ্যজনিত সমস্যাত ভুগিছে লালু প্ৰসাদ যাদৱ ৷শৰীৰত ক্ৰিয়েটিনিনৰ স্তৰ বৃদ্ধি পাইছে বিহাৰৰ প্ৰাক্তন মু্খ্যমন্ত্ৰীগৰাকীৰ। ইয়াৰ ফলত লালু প্ৰসাদ যাদৱ শাৰিৰীকভাৱে যথেষ্ট অসুস্থ হৈ পৰে। অসুস্থ লালু প্ৰসাদ যাদৱক এয়াৰ এম্বুলেঞ্চেৰে দিল্লী এইমছলৈ স্থানান্তৰিত কৰাৰ সম্ভাৱনা আছে। উন্নত চিকিৎসাৰ বাবে তেওঁক ৰাঁচীৰ পৰা দিল্লীলৈ নিয়াৰ প্ৰস্তুতি চলোৱা হৈছে৷ বৰ্তমান লালু প্ৰসাদ যাদৱ ৰাজেন্দ্ৰ চিকিৎসা বিজ্ঞান প্ৰতিষ্ঠান (RIMS) ত চিকিৎসাধীন হৈ আছে। উল্লেখ্য যে ২১ ফেব্ৰুৱাৰীত বিহাৰৰ প্ৰাক্তন মুখ্যমন্ত্ৰী লালু প্ৰসাদ যাদৱক পুনৰ পাঁচ বছৰৰ কাৰাদণ্ডৰে দণ্ডিত কৰা হৈছিল। ১৯৯৫-৯৬ চনত বিহাৰৰ দোৰান্দা কোষাগাৰৰ পৰা ১৩৯.৩৫ কোটি টকা বেআইনী ভাৱে সৰকোৱাৰ গোচৰত লালু প্ৰসাদ যাদৱক আদালতে দোষী সাব্যস্ত কৰিছিল। লালুৰ বিৰুদ্ধে উত্থাপিত পশুখাদ্য কেলেংকাৰীৰ পঞ্চমটো গোচৰত তেওঁক দোষী সাব্যস্ত কৰা হৈছিল। আৰু পঢ়কঃ ‘ডাইনোচৰ মাছ’! বয়স ১০০,ওজন ৩০০ কেজি, ১১ ফুট দীঘল এক অদ্ভূত মাছ ভাইৰেল