ডিজিটেল ডেস্কঃ কাৰাৰুদ্ধ হৈ থকা দিল্লীৰ প্ৰাক্তন উপ মুখ্যমন্ত্ৰী মনীষ চিছোদিয়াক শেহতীয়াকৈ আদালতে তেওঁৰ অসুস্থ পত্নীক সাক্ষাৎ কৰাৰ অনুমতি দিছিল। এনে অনুমতি লাভ কৰাৰ পিছতে অসুস্থ হৈ থকা পত্নীক সাক্ষাৎ কৰে মনীষ চিছোদিয়াই। অসুস্থ পত্নীক দেখি ব্যথিত হৈ পৰা চিছোদিয়াই পত্নীক আলিঙ্গন কৰি মুক হৈ ৰৈছিল। চিছোদিয়াই অসুস্থ পত্নীক আলিঙ্গন কৰাৰ আবেগিক মুহূৰ্তৰ ছবি মুখ্যমন্ত্ৰী অৰবিন্দ কেজৰিৱালে শ্বেয়াৰ কৰিছে।ছবি খন চাই এতিয়া বহুতেই অন্তৰত গভীৰ দুখ অনুভৱ কৰিছে। ছবি খন পোষ্ট কৰি কেজৰিৱালে লিখিছে পত্নী সীমাক লগ পোৱাৰ পিছত মনীষ চিছোদিয়া আৱেগিক হৈ পৰে,এই দৃশ্য অতি বেদনাদায়ক।
দিল্লীৰ প্ৰাক্তন উপ মুখ্যমন্ত্ৰী মনীষ চিছোদিয়াই শনিবাৰে তেওঁৰ পত্নী সীমা চিছোদিয়াক সাক্ষাৎ কৰে।
'এক্স'ত অৰবিন্দ কেজৰিৱালে শ্বেয়াৰ কৰা ছবিখনৰ সৈতে মুখ্যমন্ত্ৰী কেজৰিৱালে লিখিছে, "এই ছবিখন অতি বেদনাদায়ক। দেশৰ দৰিদ্ৰ শিশুসকলক আশা প্ৰদান কৰা এজন ব্যক্তিৰ বাবে এনে অন্যায় সঠিক হৈছে নে?" উল্লেখ্য চিছোদিয়াই তেওঁৰ অসুস্থ পত্নীক লগ কৰিবলৈ অনুমতি বিচাৰিছিল। পিছত ৰাউজ এভিনিউ আদালতে তেওঁক পত্নীক লগ কৰিবলৈ চৰ্ত সাপেক্ষে অনুমতি প্ৰদান কৰিছিল।
মনীষ চিছোদিয়াই তেওঁৰ পত্নীক লগ কৰিবলৈ পাঁচ দিনৰ সময় বিচাৰিছিল। অৱশ্যে, আদালতে তেওঁক শনিবাৰে পুৱা ১০ বজাৰ পৰা আবেলি ৪ বজালৈ সময় দিছিল। আদালতে তেওঁক এই সময়ছোৱাত সংবাদ মাধ্যমৰ সৈতে কথা নাপাতিবলৈ বা কোনো ধৰণৰ ৰাজনৈতিক মন্তব্য নকৰিবলৈ নিৰ্দেশ দিছিল। ইয়াৰ পিছত মনীষ চিছোদিয়াক তিহাৰ কাৰাগাৰৰ পৰা ছঘণ্টাৰ বাবে বাহিৰলৈ লৈ যোৱা হৈছিল। চিছোদিয়াই তেওঁৰ পত্নীক তেওঁৰ এবি ১৭ মথুৰা ৰোডৰ বাসগৃহত লগ পাইছিল। বৰ্তমান এই ঘৰটো আতিশী মাৰ্লেনাক আৱণ্টন কৰা হৈছে।
মনীষ চিছোদিয়াই পূৰ্বে জুন মাহত তেওঁৰ পত্নীক লগ পাইছিল। মনীষ চিছোদিয়াক দিল্লী সুৰা নীতিৰ গোচৰত চিবিআইয়ে প্ৰথমে চলিত বছৰৰ ২৭ ফেব্ৰুৱাৰীত গ্ৰেপ্তাৰ কৰিছিল। পিছত তেওঁক ৯ মাৰ্চত ইডিয়ে গ্ৰেপ্তাৰ কৰিছিল। ইয়াৰ পিছৰে পৰা তেওঁক কাৰাগাৰত ৰখা হৈছে।
Continue Reading
