ডিজিটেল ডেস্কঃ বানৰ পিছত উত্তৰাখণ্ডত সংঘটিত হৈছে আন এক দুৰ্যোগ! দেৱভূমিত নিৰ্মাণ কৰি থকা এটা সুৰংগ খহি পৰাৰ পিছত দেওবাৰে পুৱা ৪০ জন শ্ৰমিক সুৰংগৰ ভিতৰত আব্দ্ধ হৈ পৰে।ধ্বংসস্তূপৰ ভিতৰত কমেও ৪০ জন শ্ৰমিক আৱদ্ধ হৈ থকাৰ কথা প্ৰশাসনে নিশ্চিত কৰিছে। আবদ্ধ হৈ পৰি শ্ৰমিকসকলক উদ্ধাৰ কৰাৰ বাবে যুদ্ধকালীন তৎপৰতাৰে অভিযান চলি আছে। অৱশ্যে এতিয়ালৈকে কোনো শ্ৰমিকৰ মৃত্যুৰ খবৰ পোৱা হোৱা নাই।
উল্লেখ্য ৰাজ্য খনত সকলো বতৰৰ বাবে উপযোগী সুৰংগ নিৰ্মাণ কৰি থকা হৈছে। দৰ্শনাৰ্থীসকলে যাতে গোটেই বছৰটো চাৰধাম দৰ্শন কৰিব পাৰে সেইবাবেই তেনে সুৰংগৰ নিৰ্মাণ চলি আছে। উত্তৰকাশীৰ পৰা যমুনোত্ৰী ধামলৈ যোৱা পথটোৰ দৈৰ্ঘ্য কমেও ২৬ কিলোমিটাৰ হ্ৰাস কৰিব এনে সুৰংগ নিৰ্মাণ কৰা হৈছে। আজি দুৰ্ঘটনা সংঘটিত হোৱা সুৰংগটোও সেই প্ৰকল্পৰে অংশ হিচাপে নিৰ্মাণ কৰা হৈছে।
দেওবাৰে পুৱা প্ৰায় ৪ বজাত সুৰংগটোৰ এটা অংশ খহি পৰে। অৱশ্যে, দুৰ্ঘটনাটোৰ কাৰণ এতিয়াও জানিব পৰা হোৱা নাই। উত্তৰাখণ্ডৰ উত্তৰকাশী জিলাৰ ব্ৰহ্মকাল-যমুনোত্ৰী ঘাইপথৰ কাষত ৪.৫ কিলোমিটাৰ দৈৰ্ঘ্যৰ সুৰংগটোত এই দুৰ্ঘটনা সংঘটিত হয়। সুৰংগটোৰ ১৫০ মিটাৰ অংশ হঠাতে খহি পৰা বুলি জানিব পৰা গৈছে।সেই সময়ত তাত কমেও ৪০ জন শ্ৰমিকে কাম কৰি আছিল। খবৰ অনুসৰি তেওঁলোক সকলো ধ্বংসস্তূপৰ তলত আৱদ্ধ হৈ আছে।উত্তৰকাশীৰ আৰক্ষী অধীক্ষক অৰ্পন যদুবংশীয়ে ঘটনাস্থলীলৈ গৈ উদ্ধাৰ অভিযানৰ তদাৰক কৰিছে। আৱদ্ধ হৈ পৰা শ্ৰমিকসকলক বাহিৰৰ পৰাই অত্যাৱশ্যকীয় সামগ্ৰী যোগান ধৰা হৈছে।
Continue Reading
