ডিজিটেল ডেস্ক : বিজেপিয়ে পুনৰ উত্তৰ প্ৰদেশ দখলৰ চেষ্টাত সাজু কৰিছে ৰণকৌশল৷ উচ্চতম ন্যায়ালয়ে ঐতিসাহিক ৰাম জন্মভূমি গোচৰ, ২০১৯ নিষ্পত্তি হোৱাৰ পাছত বুধবাৰে প্ৰথমবাৰলৈ উত্তৰ প্ৰদেশৰ অযোধ্যাত উপস্থিত হৈছেগৈ বিজেপিৰ ৰাষ্ট্ৰীয় সভাপতি জগত প্ৰকাশ নড্ডা৷ বিজেপি শাসিত ৰাজ্যসমূহৰ মুখ্যমন্ত্ৰী আৰু উপ-মুখ্যমন্ত্ৰীয়ে নড্ডাৰ এই অযোধ্যা যাত্ৰাত সহযোগিতা আগবঢ়াব বুলি জানিব পৰা গৈছে৷
উল্লেখ্য যে কাশী বিশ্বনাথৰ প্ৰকল্পৰ প্ৰথম পৰ্যায়ৰ কাম কাজ উদ্বোধনী অনুষ্ঠানত অংশ লোৱাৰ বাবেই প্ৰধানমন্ত্ৰী নৰেন্দ্ৰ মোদীৰ সৈতে বিজেপিৰ ৰাষ্ট্ৰীয় সভাপতিগৰাকী দেওবাৰেই ৰাজ্যখনত উপস্থিত হয়৷ প্ৰধানমন্ত্ৰীৰ দুদিনীয়া বাৰাণসী ভ্ৰমণকালত অনুষ্ঠিত হোৱা সকলো কাৰ্যসূচীতে সহযোগিতা কৰিছিল নড্ডাই৷ বিজেপিৰ মুখ্যমন্ত্ৰীসকলৰ সৈতে হোৱা বৈঠকতো উপস্থিত আছিল নড্ডা৷
আগন্তুক নিৰ্বাচনক কেন্দ্ৰ কৰিয়েই বিজেপিয়ে ৰাজ্যখনত বিভিন্ন কাৰ্যসূচী ৰূপায়নেৰে ভোটাৰৰ মন আকৃষ্ট কৰাৰ চেষ্টা চলাই আহিছে৷ হিন্দু সংখ্যাগৰিষ্ঠ ৰাজ্যখনত পুনৰবাৰ যোগী চৰকাৰৰ গঠনত তৎপড় হৈ উঠিছে শাসকীয় দলটো৷
