নিজৰ মিছাইলৰ পৰাই ধ্বংস হোৱাৰ পৰা কোনোমতে বাচিল পাকিস্তান! পাৰমাণৱিক কেন্দ্ৰৰ ওচৰতে পৰিল শ্বাহীন-৩

ডিজিটেল ডেস্ক : পাকিস্তানে নিয়ন্ত্ৰণ কৰিব নোৱাৰিলে নিজৰেই মিছাইল। পাকিস্তানৰ শ্বাহীন-৩ মিছাইলৰ পৰীক্ষা ব্যৰ্থ হয়। ভয়ংকৰৰূপত বিস্ফোৰিত হয় মিছাইলটো। ২২ জুলাইত সংঘটিত হোৱা এই ঘটনা কেৱল পাকিস্তানৰ বাবেই ভয়াৱহ নহয় আনকি বেলুচিস্তানৰ লোকসকলৰ জীৱনৰ ওপৰতো প্ৰভাৱ পৰিছে বুলি জানিবলৈ পোৱা গৈছে। এই মিছাইলৰ ফলত যদিহে ডেৰা গাজী খানত থকা পাৰমাণৱিক কেন্দ্ৰটো প্ৰভাৱিত হ’লহেঁতেন তেন্তে ই সমগ্ৰ অঞ্চলটোৰ বাবে ভাবুকিৰ সৃষ্টি কৰিলেহেঁতেন ।

শেহতীয়াকৈ পাকিস্তান সেনাই নিজৰ শ্বাহীন-৩ মিছাইলৰ পৰীক্ষা কৰিছিল, যিটো পাৰমাণৱিক অস্ত্ৰ কঢ়িয়াই নিব পৰাকৈ সক্ষম আছিল । কিন্তু এই পৰীক্ষা দুৰ্ভাগ্যজনকভাৱে বিফল হ’ল। মিছাইলে লক্ষ্য হেৰুৱাই ডেৰা গাজী খান (পাঞ্জাৱ প্ৰদেশ)ৰ এটা পাৰমাণৱিক কেন্দ্ৰৰ সমীপত পৰাৰ ফলত বিস্ফোৰণ ঘটে ৷

বিস্ফোৰণৰ ফলত বেলুচিস্তানৰ ডেৰা বুগটি জিলাত অত্যাধিক প্ৰভাৱ পৰা পৰিলক্ষিত হয়। যত নাগৰিক বস্তি এলেকাৰ লোকে অধিক যন্ত্ৰণা ভূগিব লগা হয়। এই ঘটনাই পাকিস্তানৰ সৈন্য-বাহিনীৰ ওপৰত প্ৰশ্ন উঠোৱাৰ লগতে বেলুচিস্তানৰ লোকৰ জীৱনৰ ওপৰতো ভয়াৱহ সংকট কঢ়িয়াই আনিছে।

পাকিস্তানত সংঘটিত এই ঘটনাৰ পাছতেই পাকিস্তানী সেনাই ইণ্টাৰনেট সেৱা কৰ্তন কৰি দিয়ে লগতে মিডিয়াৰ সৈতে যোগাযোগ ব্যাহত কৰিব খোজে আৰু মানুহক ঘৰৰ ভিতৰত থাকিবলৈ পৰামৰ্শ জাৰি কৰে ।

উল্লেখ্য যে শ্বাহীন ৩ পাকিস্তানৰ শক্তিশালী মিছাইলৰ ভিতৰত এটা। এইটো হৈছে বেলিষ্টিক মিছাইল, যিয়ে ২৭৫০ কিলোমিটাৰ পৰ্যন্ত আঘাত কৰিব পাৰে।

২২ জুলাইত পাকিস্তানে ডেৰা গাজী খানৰ ৰাখী অঞ্চলৰ পৰা শ্বাহীন-৩ মিছাইলৰ পৰীক্ষা কৰিছিল। কিন্তু মিছাইলটোৱে নিজৰ লক্ষ্য হেৰুৱাই পেলালে আৰু বেলুচিস্তানৰ ডেৰা বুগটি জিলাৰ মেট অঞ্চলত পৰে। এই ঠাইখন অসামৰিক বসতিস্থলৰ পৰা মাত্ৰ ৫০০ মিটাৰ দূৰত আছিল। লুপ চেহৰানি লেভি ষ্টেচনৰ সমীপৰ গ্ৰেপেন ৰেভিনত ধ্বংসাৱশেষ পৰি ব্যাপক বিস্ফোৰণ ঘটে মিছাইলটোৰ। পাৰমাণৱিক কেন্দ্ৰটোত মিছাইলটো পৰি যোৱা হ'লে ধ্বংস হৈ গ'লহেতেন পাকিস্তান। নিজৰ মিছাইলৰ পৰাই ধ্বংস হোৱাৰ পৰা কোনোমতে বাচিল পাকিস্তান, ইয়াকে লৈ স্বস্তিৰ নিঃশ্বাস পেলাইছে পাকিস্তানবাসীয়ে।