ৰাছিয়াৰ সৈতে বাণিজ্য অব্যাহত ৰাখিলে ভাৰতে পৰিণাম ভুগিব লাগিব! আমেৰিকাৰ সকীয়নি

ডিজিটেল ডেস্ক : ৰাছিয়াৰ সৈতে বাণিজ্য অব্যাহত ৰাখিলে ভাৰতে পৰিণাম ভুগিব লাগিব বুলি পুনৰ আমেৰিকাই সকীয়াই দিছে। মঙলবাৰে মার্কিন সাংসদ লিণ্ডছ গ্রাহামে ভাৰত আৰু চীনক সতৰ্ক কৰি কয় যে যদি ভাৰত-চীনসহ দেশসমূহে মস্কোৰ সৈতে বাণিজ্যিক সম্পর্ক ছেদ নকৰে, তেনেহ'লে মার্কিন ৰাষ্ট্ৰপতি ড'নাল্ড ট্রাম্পে এই দেশসমূহৰ বিৰুদ্ধে আৰোপ কৰা শুল্ক বৃদ্ধি কৰিব।

সাংসদ লিণ্ডছে কয় যে ইউক্রেইনৰ সৈতে ৰাছিয়াই যুদ্ধ চলাই থকাৰ মাজতে যদি দেশসমূহে ৰাছিয়াৰ তেল ক্ৰয় কৰা বন্ধ নকৰে, তেনেহ'লে দেশসমূহে অধিক শুল্ক ভৰিবলৈ সাজু থাকক। ৰিপাব্লিকান সাংসদজনে কয় যে ট্রাম্প প্রশাসনে তেল সম্বন্ধীয় আমদানিত ১০০ শতাংশ শুল্ক আৰোপ কৰাৰ পৰিকল্পনা কৰি আছে।

ৰুছ ৰাষ্ট্ৰপতি পুটিনে ইউক্রেইনৰ বিৰুদ্ধে আগ্রাসন চলাই থকাৰ বিৰোধিতা কৰি আমেৰিকাই এই পৰিকল্পনা কৰিছে বুলি মার্কিন সাংসদজনে কয়।

ৰাছিয়াৰ তেল ক্ৰয় কৰি ইউক্রেইনৰ বিৰুদ্ধে যুদ্ধ চলাই নিবলৈ পুটিনক সহায় কৰাৰ বাবে চীন, ভাৰত আৰু ব্রাজিলৰ বিৰুদ্ধে ১০০ শতাংশ শুল্ক আৰোপৰ বিবেচনা ৰাষ্ট্ৰপতি ট্রাম্পে কৰি আছে বুলি মার্কিন সাংসদ লিণ্ডছে কয়।

উৎসঃ দৈনিক জনমভূমি