পাকিস্তানৰ সৈতে ঘনিষ্ঠতা এয়াৰ ইণ্ডিয়াৰ ভাবী এমডিৰ, 'প্লেন বি'ৰ সন্ধানত ব্যস্ত টাটা ছনছ

ডিজিটেল ডেস্কঃ উদ্বিগ্ন টাটা ছনছ! দিনদিয়েক আগেয়ে ইকাৰ আইচিক এয়াৰ ইণ্ডিয়াৰ নতুন এমডি-চিইঅ' হিচাপে নিযুক্তি দিয়াৰ সিদ্ধান্ত লৈছিল টাটা ছনছে। ১ এপ্ৰিলৰ পৰা কামত যোগদান কৰাৰ কথা আছে ইকাৰ আইচি-এ। কিন্তু কামত যোগদান কৰাৰ পূৰ্বে আহিছে এক উদ্বেগজনক খবৰ। এক সম্পূৰ্ণ নতুন জটিলতা সন্মুখলৈ অহাৰ পাছতে চিন্তাত পৰিছে টাটা ছনছ। অনুসন্ধান অনুসৰি, এয়াৰ ইণ্ডিয়াৰ দৰে অভিজাত বিভাগত এমডিৰ দায়িত্ব অৰ্পন কৰা ব্যক্তিজনৰ পাকিস্তানৰে আছে অতি ঘনিষ্ঠ সম্পৰ্ক। কেৱল পাকিস্তানেই নহয়, তুৰ্কীৰ ৰাষ্ট্ৰপতি এৰ্ডোগানৰ সৈতেও তেওঁৰ ঘনিষ্ঠ সম্পৰ্ক আছে। ইফালে তুৰ্কীৰ ৰাষ্ট্ৰপতিৰ সৈতে পাকিস্তানৰ নলে গলে লগা সম্পৰ্ক। কাশ্মীৰৰ সমস্যা সন্দৰ্ভতো মাত মাতি আহিছে তেওঁ। তেনে পৰিপ্ৰেক্ষিতত বিষয়টো এতিয়া চৰকাৰ আৰু টাটা ছনছৰ বাবে অতি সংবেদনশীল হৈ পৰিছে। অৱশ্যে, টাটা ছনছে তেওঁক এয়াৰ ইণ্ডিয়াৰ চিইঅ' হিচাপে নিযুক্তি দিব পাৰি নে নাই সেই সন্দৰ্ভত চৰকাৰৰ পৰা অনুমতি বিচাৰিছে। শেহতীয়াকৈ এই বিষয়ে প্ৰকাশ পাইছে ভাৰতীয় বাতৰি কাকতত। চৰকাৰে আইচিৰ পৃষ্ঠভূমিৰ বিষয়ে ইতিমধ্যে অনুসন্ধান কৰি আছে। ইয়াৰ সমান্তৰালকৈ ‘প্লেন বি’ৰ বিষয়েও বিবেচনা কৰিছে এয়াৰ ইণ্ডিয়াই। যদি চৰকাৰৰ পৰা সেউজ সংকেত লাভ নকৰে তেতিয়া আৰু আগবাঢ়িব নোৱাৰে এয়াৰ ইণ্ডিয়াই। অৱশ্যে, টাটা ছনছে এতিয়ালৈকে এই বিষয়ে কোনো ধৰণৰ মন্তব্য কৰা নাই। ইফালে, আন এক বিশেষ সূত্ৰই সদৰী কৰা মতে, ইকাৰ আইচি এজন তুৰ্কী নাগৰিক। ২০১৫-২০২২ বৰ্ষৰ পৰা তুৰ্কী এয়াৰলাইনছৰ চেয়াৰমেন আছিল তেওঁ। সম্প্ৰতি, তেওঁৰ বিষয়ে বিষদ বিৱৰণৰ বাবে চৰকাৰে RAW-ৰ দৰে সংস্থাৰো সহায় ল'ব পাৰে বুলি খবৰ পোহৰলৈ আহিছে।