ডিজিটেল ডেস্ক: চোৰাং বেহা তথা অবৈধ সামগ্ৰীৰ সৰবৰাহৰ বাবে নিৰাপদ পথত পৰিণত হৈছে নেকি বিমানবন্দৰ সমূহ? দেখাত কটকটীয়া যেন লাগিলেও বিমানবন্দৰত নিয়োজিত নিৰাপত্তা ব্যৱস্থাত আছে নেকি বৃহৎ সুৰুঙা বা কেৰোণ ? শেহতীয়া কিছুমান কৰ্মকাণ্ডৰ প্ৰশ্ন ব্যাপক ৰূপত উত্থাপন হ'বলৈ ধৰিছে। কিছুদিন পূৰ্বে শতাধিক বন্য জীৱ-জন্তুৰ সৈতে বেংককৰ এটা বিমানবন্দৰত গ্ৰেপ্তাৰ হৈছিল এটা ভাৰতীয় দম্পতী। বেগৰ ভিতৰত সোমোৱাই অনা এই জীৱ-জন্তু সমূহৰ সৈতে দম্পতীহাল চেন্নাই অভিমুখী বিমানত উঠাৰ আগে আগে গ্ৰেপ্তাৰ হৈছিল।
তাৰ কিছুদিন পূৰ্বে দেশৰে এটা বিমানবন্দৰৰ বন্য জন্তসহ দুজন লোকক গ্ৰেপ্তাৰ কৰা হৈছিল। নতুন দিল্লীৰ ইন্দিৰা গান্ধী আন্তঃৰাষ্ট্ৰীয় বিমানবন্দৰত এহাল দম্পতীৰ বেগত ওলাইছিল ৪৫ টা বন্দুক। আনহাতে চেন্নাইৰ বিমানবন্দৰত এগৰাকী তাঞ্জানিয়ান নাগৰিকৰ পৰা শুল্ক বিভাগে উদ্ধাৰ কৰিছে ৮.৮৬ কোটি টকা মূল্যৰ ড্ৰাগছ।
এইবাৰ দিল্লী বিমানবন্দৰত এজন ব্যক্তিৰ পৰা উদ্ধাৰ কৰা হৈছে ১৫ লক্ষাধিক ভাৰতীয় টকা মূল্যৰ আমেৰিকান ডলাৰ। বিমানবন্দৰৰ এগৰাকী জ্যেষ্ঠ বিষয়াই জনোৱা অনুসৰি বেংকক অভিমুখী এজন ব্যক্তিক আজি দিল্লী বিমানবন্দৰত ১৫ লাখতকৈও অধিক টকাৰ আমেৰিকান ডলাৰ লুকুৱাই নিয়াৰ অভিযোগত আটক কৰিছে।
দিল্লীৰ ইন্দিৰা গান্ধী আন্তঃৰাষ্ট্ৰীয় বিমানবন্দৰৰ টাৰ্মিনেল-৩ ত নিৰাপত্তা পৰীক্ষাৰ সময়ত আজি পুৱা প্ৰায় ৫ বজাত নিৰাপত্তাৰক্ষীয়ে যাত্ৰীজনক ধৰা পেলায়। মুঠ ১৯,৯০০ ডলাৰৰ নোট যাত্ৰীগৰাকীয়ে লগত নিয়া লাগেজত থকা পাপড়ৰ পেকেটত লুকুৱাই ৰখা অৱস্থাত উদ্ধাৰ কৰা হয়।
বেংকক অভিমুখী এয়াৰ ভিষ্টাৰা বিমানত উঠাৰ পূৰ্বেই তেওঁক আটক কৰা হয় আৰু কেন্দ্ৰীয় ঔদ্যোগিক সুৰক্ষা বাহিনীৰ (চিআইএছএফ) কৰ্মচাৰীসকলে শুল্ক কৰ্তৃপক্ষক গতাই দিয়ে। বিমানবন্দৰৰ জেষ্ঠ বিষয়া গৰাকীয়ে জানিবলৈ দিয়া মতে বৈধ অনুমোদন অবিহনে ইমান বৃহৎ পৰিমাণৰ বিদেশী মুদ্ৰা কঢ়িয়াই নিয়াৰ বাবে তেওঁক আটক কৰা হয়।
Continue Reading
