ডিজিটেল ডেস্কঃ ১৪দিন উকলি যোৱাৰ পাছতো অব্যাহত আছে ইজৰাইল-হামাছৰ যুদ্ধ৷ইজৰাইল আৰু পেলেষ্টাইনৰ সমৰ্থনত সমগ্ৰ বিশ্ব দুটা ভাগত বিভক্ত হৈছে৷শেহতীয়াকৈ ইজৰাইল-হামাছৰ সংঘাতৰ মাজতে ছ’চিয়েল মিডিয়াত পেলেষ্টাইন বিৰোধী মন্তব্য প্ৰকাশ কৰাৰ অভিযোগত ভাৰতীয় মূলৰ এজন চিকিৎসকক ৰয়েল বাহৰেইন হাস্পতালত পদৰ পৰা বৰ্খাস্ত কৰা হৈছে।
ডাঃ সুনীল ৰাওৱে চলি থকা যুদ্ধৰ সন্দৰ্ভত এক্স (পূৰ্বৰ টুইটাৰ)ত ধাৰাবাহিকভাৱে পোষ্ট কৰি ইজৰাইলে গাজা ষ্ট্ৰিপত পেলেষ্টাইনী সন্ত্ৰাসবাদী সংগঠন হামাছৰ সৈতে যুঁজি থকাৰ সময়ত সমৰ্থন প্ৰকাশ কৰে। এই টুইটসমূহ বাহৰেইন কৰ্তৃপক্ষৰ দৃষ্টিগোচৰ কৰাইছিল এক্সৰ এজন ব্যৱহাৰকাৰীয়ে।
ৰয়েল বাহৰেইন হাস্পতালে ডাঃ ৰাওৰ এই কার্যক লৈ এক্স সম্পর্কে এক বিবৃতি প্রকাশ কৰি কয় যে, “আভ্যন্তৰীণ চিকিৎসাৰ বিশেষজ্ঞ হিচাপে কাম কৰা ডাঃ সুনীল ৰাৱে ছ’চিয়েল মিডিয়াত আমাৰ সমাজৰ বাবে আপত্তিজনক টুইট পোষ্ট কৰাটো আমাৰ দৃষ্টিগোচৰ হৈছে৷আমি নিশ্চিত কৰিব বিচাৰো যে তেওঁৰ টুইট আৰু মতাদৰ্শ ব্যক্তিগত আৰু ইয়াত চিকিৎসালয়ৰ মতামত আৰু মূল্যবোধ প্ৰতিফলিত নহয়।এয়া আমাৰ আচৰণবিধিৰ উলংঘা, আৰু আমি প্ৰয়োজনীয় আইনী ব্যৱস্থা গ্ৰহণ কৰিছো, আৰু তেওঁৰ সেৱা বন্ধ কৰা হৈছে।”
উল্লেখ্য যে এই বিতৰ্কৰ প্ৰতি সঁহাৰি জনাই ডাঃ ৰাৱে এক্সৰ ওপৰত ক্ষমাপ্ৰাৰ্থনা প্ৰকাশ কৰি তেওঁৰ বক্তব্যৰ সংবেদনহীনতাক স্বীকাৰ কৰে।
Continue Reading
