পেট্ৰ’ল-ডিজেলৰ দাম জুই-ছাই, এতিয়া জীৱন ৰক্ষক দৰব ক্ৰয় কৰিবলৈও ভাবিব লাগিব সাতবাৰ

ডিজিটেল ডেস্ক: অত্যাৱশ্যকীয় সামগ্ৰীৰ দামবৃদ্ধিয়ে বিপৰ্যস্ত কৰিছে ৰাইজক৷ অসমত পেট্ৰ’লৰ দামে চুইছে শতকৰ ঘৰ৷ পাঁচদিনত চাৰিবাৰ ধাৰাবাহিকভাৱে বৃদ্ধি পাইছে পেট্ৰ’ল আৰু ডিজেলৰ দাম৷ আজি পুনৰ প্ৰতি লিটাৰত ৮০ পইচাকৈ বৃদ্ধি পাইছে পেট্ৰ’ল-ডিজেলৰ দাম৷ চাৰিটা বৃদ্ধিত পেট্ৰ’ল আৰু ডিজেলৰ দামবৃদ্ধি পালে ৩.২০ টকাকৈ৷ অকল পেট্ৰ’ল, ডিজেলৰ দামবৃদ্ধিয়েই নহয়, এইবাৰ জীৱনদায়িনী ঔষধৰ দাম বৃদ্ধি কৰি জনতাক মাধমাৰ সোধাবলৈ সাজু হৈছে বিজেপি নেতৃত্বাধীন কেন্দ্ৰীয় চৰকাৰ৷ পাঁচখন ৰাজ্যৰ নিৰ্বাচনৰ পৰিপ্ৰেক্ষিতত দাম বৃদ্ধি স্থগিত ৰাখিছিল চৰকাৰে৷ আৰু নিৰ্বাচন সমাপ্ত হৈ ৰাজ্যসমূহত চৰকাৰ গঠনৰ পাছতেই দামবৃদ্ধিৰে যেন চমক সৃষ্টিৰ চেষ্টাহে চলাইছে বিজেপি চৰকাৰে৷ ইতিমধ্যে, দাম বৃদ্ধিৰ ফলত জনসাধাৰণে এতিয়া তেওঁলোকৰ ঘৰুৱা বাজেটত ঔষধৰ বাবে ৰাখিব লাগিব সাঁচতীয়া ধন৷ অত্যাৱশ্যকীয় ঔষধ, যাৰ ভিতৰত আছে পেইনকিলাৰ, সংক্ৰমণ-প্ৰতিৰোধী দৰব, হৃদৰোগ আৰু এণ্টিবায়’টিকৰ এপ্ৰিলৰ পৰা বাঢ়িব দাম৷ চৰকাৰে ঔষধ কোম্পানীবোৰক বাৰ্ষিক পাইকাৰী মূল্য সূচকৰ (ডব্লিউপিআই) পৰিৱৰ্তনৰ সৈতে সংগতি ৰাখি বৃদ্ধি ৰখাৰ অনুমতি দিব। ডব্লিউপিআইৰ বাৰ্ষিক পৰিৱৰ্তন ২০২১ বৰ্ষত ১০.৮% হয় বুলি ঔষধৰ মূল্য নিয়ন্ত্ৰক নেচনেল ফাৰ্মাচিউটিকেল প্ৰাইচিং অথৰিটীয়ে (এনপিপিএ) শুকুৰবাৰে সদৰী কৰে৷ শেহতীয়াকৈ জাৰি কৰা নিৰ্দেশনা অনুসৰি, মুখ্য চিকিৎসাবোৰত ৮৫০ৰো অধিক ফৰ্মুলেচনৰ দাম কমেও ১০% বৃদ্ধি হোৱাৰ সম্ভাৱনা আছে৷ ঐতিহাসিকভাৱে, ডব্লিউপিআইৰ বাৰ্ষিক পৰিৱৰ্তনৰ ফলত দামবৃদ্ধি যোৱা কেইবছৰমানত ১-২% পৰিসৰত সামান্য হৈছে। ২০১৯ চনৰ বাবে, এন.পি.পি.এ.-এ ঔষধ কোম্পানীবোৰক প্ৰায় ২% দামবৃদ্ধিৰ অনুমতি দিছিল৷ আনহাতে ২০২০ চনত বাৰ্ষিক ডব্লিউ.পি.আই.ৰ পৰিৱৰ্তনৰ সৈতে সংগতি ৰাখি দাম ০.৫% বৃদ্ধি কৰা হৈছিল। এনপিপিএয়ে অহা কেইদিনমানৰ ভিতৰত অনুসূচীত ফৰ্মুলেচনৰ সৰ্বোচ্চ দামৰ বিষয়ে অৱগত কৰিব। ঔষধৰ দামবৃদ্ধিৰ লগে লগেই জনজীৱনত প্ৰভাৱ পৰাটো নিশ্চিত৷ ইতিমধ্যে, আৰ্থিক দুৰৱস্থা আৰু ক’ভিডে বিপৰ্যস্ত কৰাৰ পাছত দেশৰ নাগৰিকৰ চান কাঢ়ি ৰাজভঁৰাল টনকিয়াল কৰাৰ পৰিকল্পনা কৰিছে বিজেপি নেতৃত্বাধীন কেন্দ্ৰীয় চৰকাৰে৷