ডিজিটেল ডেস্কঃ দুৰ্নীতিৰ বাবে বহিষ্কাৰ কৰা ভাৰতীয় ক্ৰিকেট কৰ্মকৰ্তা ললিত মোদীৰ প্ৰেমত পৰিছে প্ৰাক্তন মিছ ৱৰ্ল্ড তথা বলীউডৰ তাৰকা অভিনেত্ৰী সুস্মিতা সেন। খবৰটো পোহৰলৈ অহাৰ পিছতে চৰম কটুক্তিৰ সন্মুখীন হ’বলগীয়া হয় সুস্মিতা সেনে। মোদীৰ সৈতে বঙ্গতনয়াৰ অন্তৰংগ মুহূৰ্তৰ ছবিবোৰে আক্ষৰিক অৰ্থত স্তম্ভিত কৰি তুলিছে নেটিজেনক! প্ৰাক্তন মিছ ইউনিভাৰ্ছে এই প্ৰেমক লৈ এতিয়ালৈকে এটা টু-শব্দও কৰা নাই। কিন্তু ছ’চিয়েল মিডিয়াত অব্যাহত আছে চৰ্চা।
ললিত মোদীয়ে বৃহস্পতিবাৰে টুইটযোগে সুস্মিতাৰ সৈতে ‘বিবাহ’ৰ কথা ঘোষণা কৰে। পিছ মুহূৰ্ততে ভুলটো শুধৰাই ক’লে যে বিয়া নহয়, আমি ডেটিঙহে দি আছো। সম্প্ৰতি প্ৰেমত পৰিছে দুয়ো। ললিত মোদীয়ে মালদ্বীপত কটোবা জীপাল সময়ৰ ছবিও ইতিমধ্যে ৰাজহুৱা কৰা দেখিবলৈ পোৱা গৈছে।
পিছে ললিত মোদীৰ সৈতে এই সম্পৰ্কক লৈ অত্যুত্সাহী বঙ্গতনয়াই শুনিব লগা হৈছে তিতা কথা, টুইটাৰ ভৰি পৰিছে মিমেৰে।
আইপিএলৰ কেলেংকাৰীত নাম সাঙোৰ খাই পৰা ললিত মোদীয়ে কি যাদুৰে সুস্মিতা সেনৰ হৃদয় জয় কৰিলে তাক লৈ সঘন চৰ্চা চলিছে। কিছুমানে স্পষ্ট কৰি দিছে, ‘টকা থাকিলে সকলো সম্ভৱ’। টকাৰ স্বাৰ্থত ললিত মোদীৰ প্ৰেমত পৰিছে নেকি বুলি প্ৰাক্তন মিছ ইউনিভাৰ্ছলৈ প্ৰশ্নও কৰিছে নেটিজেনে।
১৯৯০ চনৰ অক্টোবৰ মাহত ললিতে মিনাল মোদীৰ সৈতে বিবাহপাশত আবদ্ধ হৈছিল ললিত মোদী। ২০১৮ চনত কৰ্কট ৰোগত আক্ৰান্ত হৈ মৃত্যু হৈছিল মিনালৰ। সুস্মিতাৰ লগতো মিনালৰ বন্ধুত্বপূৰ্ণ সম্পৰ্ক আছিল। মিনাল আৰু ললিতৰ আছে তিনিটা সন্তান।
সুস্মিতা সেনে নিজৰ ব্যক্তিগত জীৱনৰ বিষয়ে সদায় মুকলিকৈ কৈ আহিছে। প্ৰেমত পৰিলেও তেওঁ মুকলিকৈ স্বীকাৰ কৰে, সম্পৰ্কটো ভাঙিলেও তেওঁ অনুৰাগীসকলৰ সৈতে শ্বেয়াৰ কৰে। অৱশ্যে, ললিত মোদীৰ সৈতে সম্পৰ্ক সন্দৰ্ভত এতিয়াও কোনো মন্তব্য কৰা নাই প্ৰাক্তন মিছ ইউনিভাৰ্ছ সুস্মিতাই। বিগত বৰ্ষৰ ডিচেম্বৰ মাহত প্ৰেমিক ৰোমান শ্বেলৰ সৈতে তিনি বছৰীয়া সম্পৰ্কত ইতিৰেখা টানিছিল সুস্মিতা সেনে। সুস্মিতাতকৈ ৰোমান বহুত সৰু আছিল। আনহাতে, ললিতৰ সৈতে সুস্মিতাৰ বয়সৰ পাৰ্থক্য প্ৰায় ১০ বছৰ! অৱশ্যে, ললিতৰ সৈতে সুস্মিতাৰ গঢ় লোৱা সম্পৰ্কক সহজে মানি লৈছে প্ৰাক্তন প্ৰেমিকে।
সুস্মিতাৰ প্ৰাক্তন প্ৰেমিকে সংবাদ মাধ্যমৰ আগত কয়, ‘সিহঁত সুখী হওক। প্ৰেম ধুনীয়া। মই এইখিনিকেই জানো। যদি কোনোবাই কাৰোবাক পছন্দ কৰে তাৰ মানে সেয়া অমূল্য।’
Continue Reading
