প্ৰলোভনেৰে ঘৰৰ পৰা মাতি নিছিল কলা-বোবা কিশোৰীক, তাৰ পাছত ছয় দুৰ্বৃত্তৰ এই অমানৱীয় কাৰ্য

ডিজিটেল ডেস্ক : সাৰি নগ’ল মূক-বধিৰ কিশোৰীও। এইবাৰ এগৰাকী কলা-বোবা কিশোৰীৰ ঘৰৰ পৰা ফুচুলাই নি দলবদ্ধ ধৰ্ষণ কৰিলে ছজন লোকে। এই ছজনৰ ভিতৰত চাৰিজনেই হৈছে কিশোৰ। এই ঘটনাই সৰ্বত্ৰে চাঞ্চল্যৰ সৃষ্টি কৰিছে। বিগত সোমবাৰে সংঘটিত হোৱা এই ঘটনা এতিয়া পোহৰলৈ আহিছে। জানিব পৰা মতে, কিশোৰীগৰাকীক ঘৰৰ পৰা ফুচুলাই এক নিৰ্জন স্থানলৈ লৈ গৈছিল এজন লোকে। তাত ৰৈ আছিল আন পাঁচজন লোক।

আটাইকেইজন লগ হৈ দলবদ্ধভাৱে কিশোৰীগৰাকীক ধৰ্ষণ কৰে। কিশোৰীগৰাকীয়ে বাধা দিবলৈ চেষ্টা কৰাত কিশোৰীগৰাকীৰ ওপৰত চলোৱা হয় নিৰ্মম নিৰ্যাতন। অতি নিকৃষ্ট মানসিকতাৰ অপৰাধীকেইজনে কিশোৰীগৰাকীৰ ওপৰত চলোৱা নিৰ্যাতনৰ ফটো উঠাই সেয়া প্ৰচাৰো কৰি দিয়ে। দুৰ্ভাগ্যজনক কথাটো হৈছে বোবা কিশোৰীগৰাকীয়ে তেওঁৰ ওপৰত চলা এই নিৰ্যাতনৰ কথা কাকো ক’বও পৰা নাছিল। পাছত ঘটনাক্ৰমে ঘৰৰ কাষৰে এজন লোকলৈ তেওঁৰ ওপৰত নিৰ্যাতন চলাৰ এখন আলোকচিত্ৰ আহে। তাৰে আঁত ধৰি পৰিয়ালৰ লোকে কথাবোৰ বিচাৰ-খোঁচাৰ কৰিবলৈ আৰম্ভ কৰে। অৱশেষত আকাৰে ইংগিতে নিজৰ ওপৰত হোৱা নিৰ্যাতনৰ কথা বিবৰি কয় কিশোৰীগৰাকীয়ে। তাৰ পাছতে সৃষ্টি হয় তীব্ৰ চাঞ্চল্যৰ।

এই ঘটনা সংঘটিত হৈছে মধ্যপ্ৰদেশৰ শ্বাহদোলত। নিৰ্যাতিতাৰ মাতৃয়ে দিয়া গোচৰৰ আঁত ধৰি আৰক্ষীয়ে ঘটনাৰ তদন্ত আৰম্ভ কৰে। শ্বাহদোলৰ আৰক্ষী অধীক্ষকে প্ৰকাশ কৰা মতে, কিশোৰীগৰাকীয়ে আলোকচিত্ৰ চাই অভিযুক্তকেইজনক চিনাক্ত কৰিছে আৰু আৰক্ষীয়ে ছয়োজন অভিযুক্তকে গ্ৰেপ্তাৰ কৰিছে। কিশোৰীগৰাকীৰ ওপৰত এনে অমানুষিক নিৰ্যাতন চলোৱা লোককেইজন চুবুৰীয়া লোক বুলি জানিব পৰা গৈছে। এগৰাকী কলা-বোবা কিশোৰীৰ দুৰ্বলতাৰ সুযোগ গ্ৰহণ কৰি এনে দুঃষ্কাৰ্য সংঘটিত কৰা লোককেইজনৰ মানসিকতাক লৈ এতিয়া সৰ্বত্ৰে তিক্ত প্ৰতিক্ৰিয়া প্ৰকাশ পোৱা দেখা গৈছে।