মুখ্যমন্ত্ৰীৰ ঘোষণা: ২০ এপ্ৰিলৰ পাছত ঘোষণা কৰা হ’ব হায়াৰ ছেকেণ্ডাৰী পৰীক্ষাৰ ফলাফল

ডিজিটেল ডেস্ক: এইবাৰ বহাগ বিহুৰ পূৰ্বে মেট্ৰিক পৰীক্ষাৰ ফলাফল ঘোষণা কৰা হ’ব যদিও বিহুৰ পাছতহে উচ্চতৰ মাধ্যমিক (হায়াৰ ছেকেণ্ডাৰী)পৰীক্ষাৰ ফলাফল ঘোষণা কৰা হ’ব। অহা ২০ এপ্ৰিলৰ পাছত হায়াৰ ছেকেণ্ডাৰী পৰীক্ষাৰ ফলাফল ফলাফল ঘোষণা কৰা হ'ব। 

এইকথা প্রকাশ কৰে মুখ্যমন্ত্রী ড° হিমন্ত বিশ্ব শর্মাই। সমাগত বিধানসভাৰ নিৰ্বাচনৰ প্ৰচাৰ অভিযানত অংশগ্রহণ কৰি ৰাজ্যৰ ইমূৰৰ পৰা সিমূৰলৈ ঘূৰি ফুৰা মুখ্যমন্ত্রীজনে এক জনসভাত অংশ ল'বলৈ যোৱাৰ সময়ত পৰীক্ষার্থী ভাগিনে ফলাফল ঘোষণা কৰা বিষয়ত কৰা প্রশ্নৰ উত্তৰ দি অহা ২০ এপ্রিলৰ পাছত আনুষ্ঠানিকভাৱে উচ্চতৰ মাধ্যমিক চূড়ান্ত পৰীক্ষাৰ ফলাফল ঘোষণা কৰা হ'ব বুলি প্রকাশ কৰে।

লক্ষণীয় যে অহা ১০ এপ্রিলত মেট্রিক পৰীক্ষাৰ ফলাফল ঘোষণা কৰাৰ পাছতে বিহুৰ পূর্বেই উচ্চতৰ মাধ্যমিকৰো ফলাফল ঘোষণা কৰা হ'ব বুলি আশা কৰা হৈছিল। কিন্তু মুখ্যমন্ত্রীজনে বিহুৰ পাছতহে ফলাফল ঘোষণা কৰাৰ কথা নিশ্চিত কৰে। 

ইফালে অসম ৰাজ্যিক বিদ্যালয় শিক্ষা পৰিষদে উচ্চতৰ মাধ্যমিকৰ ফলাফল ঘোষণা কৰাৰ বাবে যাৱতীয় প্রস্তুতি প্রায় চূড়ান্ত কৰিছে বুলি জানিব পৰা গৈছে। প্রণিধানযোগ্য যে চলিত বৰ্ষত ৰাজ্যৰ ৮২১টা পৰীক্ষা কেন্দ্রত চাৰিওটা শাখাত মুঠ ৩.৩০ লাখ পৰীক্ষার্থীয়ে এই পৰীক্ষাত অৱতীর্ণ হৈছিল। যোৱা ১১ ফেব্রুৱাৰীৰ পৰা ১৬ মাৰ্চলৈ এই পৰীক্ষা অনুষ্ঠিত হৈছিল।

উৎসঃ দৈনিক জনমভূমি