পণ্ডিত বিৰজু মহাৰাজৰ মৃত্যুত সংগীত সত্ৰৰ শোক প্ৰকাশ

ডিজিটেল ডেস্কঃ কিম্বদন্তি কথক নৃত্যশিল্পী, বিশিষ্ট নৃত্য সংৰচক, সংগীতকাৰ পণ্ডিত বিৰজু মহাৰাজৰ মৃত্যুত সংগীত সত্ৰ, গুৱাহাটীয়ে গভীৰ শোক প্ৰকাশ কৰে৷ সংগীত সত্ৰ, গুৱাহাটীৰ সভাপতি স্বপ্ননীল বৰুৱা আৰু সচিব ৰঞ্জুমণি শইকীয়াই বিবৃতিযোগে জনাইছে যে ভাৰতীয় মাৰ্গীয় নৃত্যক বিশ্বৰ নৃত্যপ্ৰেমীৰ আগত সমুজ্জ্বল ৰূপত প্ৰদৰ্শন কৰি বন্দিত হোৱা বিৰজু মহাৰাজ চিৰস্মৰণীয় হৈ থাকিব ৷ কথক নৃত্যৰ মহীৰূহ শিল্পীগৰাকী সত্ৰীয়া নৃত্যৰ প্ৰতি সততে শ্ৰদ্ধাশীল আছিল৷ অসমৰ সাংস্কৃতিক সমাজখনতো এখন বিশিষ্ট আসনৰ অধিকাৰী আছিল পণ্ডিত মহাৰাজ৷পণ্ডিত বিৰজু মহাৰাজৰ মৃত্যু অসমৰ বাবেও অপূৰণীয় ক্ষতি বুলি বৰুৱা আৰু শইকীয়াই বিবৃতিটোত উল্লেখ কৰিছে৷