ডিজিটেল ডেস্কঃ অষ্ট্ৰেলিয়াৰ পৰা আহি পৰিছে এক মৰ্মান্তিক ঘটনাৰ খৱৰ৷ যোৱা মাহত ছিডনীত বাইক আৰু এছ ইউ ভিৰ মুখামুখি খুন্দাৰ ফলত মৃত্যু হোৱা উবেৰ ইটছৰ এজন ২২ বছৰীয়া ডেলীভাৰী যুৱকক মুম্বাইৰ বুলি চিনাক্ত কৰা হৈছে।
ফেব্ৰুৱাৰী মাহত ছিডনীস্থিত মেকৱেৰী বিশ্ববিদ্যালয়ত অৰ্থনীতি বিভাগত স্নাতকোত্তৰ ডিগ্ৰী অধ্যয়নৰ বাবে বৃত্তি লৈ ছিডনীলৈ অহা অক্ষয় দৌলটানীৰ ২২ জুলাইত ৰয়েল নৰ্থ শ্ব’ৰ চিকিৎসালয়ত মৃত্যু হয়৷পৰিচয় নিশ্চিত কৰি লেবাৰৰ চিনেটৰ টনি শ্বেলডনে চলিত সপ্তাহৰ আৰম্ভণিতে সংসদত কয় যে ২০১৭ চনৰ পাছত চাকৰিৰ সময়তে নিহত হোৱা অক্ষয় হৈছে ১২ সংখ্যক ফুড ডেলিভাৰী ৰাইডাৰ।
সোমবাৰে শ্বেলডনে কয় যে অক্ষয়ে নিজৰ সপোন পূৰণৰ বাবে আৰু পৰিয়ালক উজ্জ্বল ভৱিষ্যত দিবলৈ বৃত্তিৰে এই দেশলৈ আহিছিল৷অক্ষয়ৰ সম্পৰ্কীয়ই জনাইছে যে তেওঁ বহিঃৰাষ্ট্ৰলৈ আহিব বিচৰাৰ একমাত্ৰ কাৰণটো হ’ল পৰিয়ালৰ বাবে অধিক সুবিধা প্ৰদান কৰা যাতে তেওঁলোকে এটা ভাল জীৱনশৈলী জীয়াই থাকিব পাৰে।
মাচুল পৰিশোধ কৰিবলৈ অক্ষয়ে সপ্তাহত কমেও তিনিবাৰ ফুড ডেলিভাৰী ৰাইডাৰ হিচাপে কাম কৰিছিল।বৰ্তমান এই দুৰ্ঘটনাটোৰ তদন্ত অব্যাহত ৰাখিছে নিউ চাউথ ৱেলছ (এন এছ ডব্লিউ) আৰক্ষী আৰু ছেফৱৰ্ক এন এছ ডব্লিউৱে।শ্বেলডনে কয় যে অক্ষয়ৰ এই মৰ্মান্তিক ক্ষতিটোৱে গিগ ইকনমি কিমান বিপজ্জনক হ’ব পাৰে তাৰ আন এক উদাহৰণ য’ত শ্ৰমিকসকলে কেৱল জীৱন নিৰ্বাহৰ বাবে নিজকে চৰম সীমালৈ ঠেলি দিবলৈ বাধ্য হয়।
ইয়াৰ উপৰিও চিনেটৰগৰাকীয়ে পৰিবহণ সংস্কাৰৰ আহ্বান জনায় যাতে উদ্যোগটোত প্ৰায় ২ লাখ ৫০ হাজাৰ গিগ শ্ৰমিকসকলে মৌলিক নিয়োগৰ অধিকাৰৰ লগতে সঠিক ক্ষতিপূৰণ লাভ কৰে।
Continue Reading
